Президент Қасым-Жомарт Тоқаев Украина төңірегіндегі жағдайға тағы пікір білдірді, деп хабарлайды Ulysmedia.kz.
Бүгін Қасым-Жомарт Тоқаев «Орталық Азия – Еуропа Одағы» саммитіне қатысқан болатын. Ақорда Тоқаевтың саммиттегі сөзін жариялады. Президент өз сөзінде Украинадағы жағдайға да тоқталған.
- Қазақстан кез келген қақтығыстың бейбіт жолмен шешілуін жақтайды. Сондықтан Украинаға қатысты келіссөздердің басталуын құптайды. Мәселенің күрделі екеніне қарамастан, шиеленістің оң шешімін табатынына сенім артады, дейді Тоқаев саммитте.
“БІЗДІҢ ҰСТАНЫМ ШЫНДЫҚҚА АЙНАЛДЫ”
Еске салайық, бұған дейін президент ақпанда өңір жастарымен жүздескен сәтінде Украинадағы жағдай жөнінде пікір білдірген болатын.
Біз «Бірлігіміз – әралуандықта» идеологиясын темірқазық етіп ұстанып отырмыз. Ұлтымыз бен наным-сеніміміз әртүрлі екеніне қарамастан, бір қоғамда тұтас халық болып өмір сүреміз. Мен баршаңызды осынау терең үдерісті толық түсінуге шақырамын. Сонда ғана табысқа жете аламыз. Қазір Украина жөнінде көп айтылып жатыр. Біз алғашқы кезден бастап осы соғысты міндетті түрде тоқтату керек, дипломатиялық келіссөздер арқылы бір мәмілеге келу қажет деп айттық. Бұл ұстанымымыз енді шындыққа айналды. Екі алпауыт ел саяси сұхбат жүргізе бастады. Бұл – жақсы үрдіс. Әрі Қазақстанға пайдасын тигізеді. Сондықтан біз мұны мейлінше қолдаймыз, – деді президент.
