Актер Шәріп Серік сүйіктісі Алия Бутееваны лифтіде жұлқылап, соққыға жығуына қатысты алғаш рет пікір білдірді, деп хабарлайды Ulysmedia.kz.
АКТЕР НЕ ДЕЙДІ
- Мен зорлық-зомбылыққа қарсымын. Өкінішке қарай, сіздердің бәріңіз менің Алия Бутееваны лифтіден дөрекі түрде сүйреп шығарған видеоны көрдіңіздер. Өзімді ақтағым келмейді. Мен қателікке бой алдырдым және заң бойынша жауап беруге дайынмын.
Көпшілігіңіз ұрсысып қалған кезінде ашуға булыққан сәттерді бастан өткерген шығарсыздар. Бірақ мен сіздерден өтініп сұрарым – менің қателігімді қайталамаңыздар, ешқашан қол көтермеңіздер. Мен Алияны шапалақпен ұрдым. Осы әрекетім үшін одан, оның отбасынан және менің әрекетімнен көңіліне жара салған барша адамдардан кешірім сұраймын, дейді актер.
МӘН-ЖАЙ
Еске салайық, 4 сәуірге қараған түні актердің сүйіктісі, қазақстандық блогер Алия Бутеева актер Шәріп Серіктің жалаңаяқ күйінде оның артынан жүгіріп шығып, қолынан жұлқып, лифтіден күшпен алып шыққан сәтін түсірген фото мен видеоны жариялаған болатын. Суреттерде қыздың бетінде соққыдан із қалғаны да анық көрінеді.
Өз жазбасында бойжеткен болған оқиға жайлы эмоцияға беріліп айтып, үнсіз қалмайтынын жеткізді.
ПОЛИЦИЯ НЕ ДЕЙДІ
Алматы қаласының полиция департаменті бұл дерекке қатысты тексеріс жүргізіп жатыр.
- Оқиғаның болған орны мен уақыты, объективті мән-жайлары анықталып, Қазақстан Республикасының заңнамасына сәйкес шаралар қабылданатын болады, деді ПД ресми өкілі Салтанат Әзірбек.
