Ресей Каспий құбыр консорциумына 200 мың рубль (шамамен 1,2 миллион теңге) айыппұл салды, деп хабарлайды Ulysmedia.kz.
СОТ ШЕШІМІ
Бұл шешімді Ресейдің Новороссийск қаласындағы Приморск аудандық соты шығарды.
ТАЛАПТАР БҰЗЫЛҒАН
Ресейдің көлік саласындағы қадағалау қызметінің инспекторлары КҚК-ның Қара теңіздегі теңіз терминалында мұнай мен басқа да қауіпті жүктерді тиеу және түсіру барысын тексерген.
Тексеру кезінде инспекторлар 43 түрлі құжатты қарап, арнайы құрылғылар мен жабдықтардың жағдайын зерттеген. Нәтижесінде, мұнайды жағалаудан алшақ орналасқан айлақтар арқылы тасымалдау кезінде қауіпсіздік талаптарының бұзылғаны анықталған.
УАҚЫТ БЕРІЛДІ
Қадағалаушы орган компанияға анықталған проблеманы 2025 жылдың 30 маусымына дейін шешуді міндеттеді. Сонымен қатар, КҚК-ға 200 мың рубль көлемінде айыппұл салынды.
Айта кетейік, заң бойынша мұндай бұзушылықтар үшін бұдан да қатаң жаза қарастырылған. Дегенмен, бұл жағдайда теңіз айлақтарындағы жұмыс тоқтатылмайды.
БҰҒАН ДЕЙІН
Еске салайық, бұған дейін Каспий құбыр консорциумы Көлік саласындағы федералдық бақылау қызметі жүргізген жоспардан тыс тексеруден кейін үш айлақтық қондырғының екеуінің жұмысын тоқтатқаны хабарланған еді. Компанияның мәліметінше, әңгіме КҚК-1 және КҚК-2 қондырғылары туралы болды.
ҚАУІПСІЗДІК ТЕКСЕРУІ ҚОРЫТЫНДЫЛАРЫ
Ресей үкіметінің тапсырмасымен ведомство Азов-Қара теңіз бассейніндегі су көлігі инфрақұрылымының қауіпсіздігін тексеріп жатыр. Бұл тексерулер қауіпті жүктерді тиеу-түсіру жұмыстарын жүргізу кезінде қауіпсіздікті қамтамасыз ету мақсатында ұйымдастырылған. Тексеру Новороссийск, Темрюк, Сочи, Туапсе және басқа да теңіз порттарында әрекет ететін ұйымдарға қатысты жүргізілді.
Тексеру жұмыстары 2024 жылғы 15 желтоқсанда Керчь бұғазында танкерлер апаты нәтижесінде мұнай өнімдерінің төгілуі себебінен төтенше жағдайға байланысты қолға алынды.
