LRT жобасы аясындағы берешекті өтеу шеңберінде ғимараттар мен жер учаскесі мемлекет меншігіне өткізілді, деп хабарлайды Ulysmedia.kz.
Астаналық прокуратураның мәліметінше, борышкерлер жалпы саны 40 нысанды мемлекетке қайтарған:
39 коммерциялық (тұрғын емес) ғимарат;
Жалпы ауданы 12,8 гектарды құрайтын, асфальт-бетон зауытына қызмет көрсетуге арналған теміржол жолдары бар жер телімі.
Аталған активтердің жалпы нарықтық құны — 920 миллион теңге.
Бұған қоса, қазір мемлекетке тағы 615 миллион теңге тұратын 37 нысанды қайтару жұмыстары жүріп жатыр.
Прокуратура нақтылағандай, бұл мүліктердің барлығы «City Transportation Systems» ЖШС-нің балансына берілуде. Айта кетейік, бұл компания бұған дейін «Астана LRT» деп аталған және оның жалғыз құрылтайшысы — Астана қаласының әкімдігі.
Бұған дейін елорда әкімдігі LRT жобасын 2035 жылға дейін іске қосу жоспарын жариялаған болатын.
