Қазақстанның әйелдер теннис құрамасы тағы да тарих бетіне өз атын жазды — команда әлемдегі ең беделді командалық жарыстардың бірі саналатын Билли Джин Кинг кубогының финалдық кезеңіне жолдама алды. Бұл — ел тарихындағы үшінші рет қайталанып отырған жетістік, деп хабарлайды Ulysmedia.kz.
Колумбиямен сенімді жеңіс
«D» тобының шешуші матчында Юрий Щукиннің шәкірттері Колумбия құрамасын 2:0 есебімен сенімді түрде жеңді.
Алғашқы кездесуде Юлия Путинцева Валентина Ариасты 6:0, 6:1 есебімен оңай ұтса, одан кейін Елена Рыбакина өзінің деңгейін тағы бір дәлелдеп, Юлиана Лисаразоны 6:1, 6:2 есебімен тізе бүктірді. Осылайша, шешуші ұпайды Қазақстан қоржынына салды.
Аустралиямен ойындағы маңызды жеңіс
Айта кетерлігі, топтағы алғашқы матчта қазақстандықтар Билли Джин Кинг кубогында жеті мәрте жеңіске жеткен, "Үлкен дулыға" турнирінің иесі — Аустралия құрамасын жеңген болатын. Бұл жеңіс Қазақстан теннисін дамытудағы стратегияның тиімділігін айқын көрсетті.
Финал Қытайда өтеді
Финалдық кезең 16-21 қыркүйегі аралығында Қытайдың Шэньчжэнь қаласында өтеді. Бұл күндер Азия турнирлерінің қарсаңына сәйкес келеді, сондықтан теннисшілер үшін қолайлы уақыт.
Финалға турнир иесі Қытай, қазіргі чемпион — Италия және Қазақстан тікелей жолдама алса, қалған бес команда басқа топтардың іріктеу ойындарынан кейін анықталады.
Федерация басшысы Өтемұратов қолдау көрсетті
Қазақстан құрамасын Брисбенде тікелей қолдауға барған Қазақстан теннис федерациясының президенті Болат Өтемұратов матчтан кейін ерекше құттықтау жолдады:
«Барша теннис жанкүйерлерінің атынан бұл тарихи жетістікпен қазақстандықтарды шын жүректен құттықтаймын. Біздің команда Билли Джин Кинг кубогының финалдық кезеңіне өз тарихында үшінші рет жолдама алып отыр. Бұған дейін біз 2022 және 2023 жылдары финалдық кезеңде ойнадық. Бұл — тек теннис үшін емес, жалпы қазақ спорты үшін маңызды оқиға. Командалық әлем чемпионатына қатысу — құрамамыздың және еліміздің теннис жүйесінің жоғары деңгейін көрсетеді. Бұл — ұзақ жылғы тынымсыз еңбектің нәтижесі. Біз дұрыс бағытта дамып келе жатқанымызды дәлелдейтін көрсеткіш. Мұндай жетістік — мақтаныш қана емес, бүкіл елдегі жас теннисшілер үшін зор мотивация. Олар қазақстандық спортшылардың әлем аренасында нық ойнап жүргенін көріп, өздері де биікке ұмтылады».
