Жамбыл облысында шенеунікке пара бермек болған үш адам ұзақ жылға сотталды

МӘН-ЖАЙ

Жамбыл облысының қылмыстық істер жөніндегі мамандандырылған ауданаралық соты 3 сотталушы – М., Т. және У.-ға қатысты қылмыстық істі қарады.

Сотталушылар М. және Т. аса ірі мөлшерде алдын ала сөз байласу арқылы адамдар тобында лауазымды тұлғаға пара бергені үшін (ҚК 367-бабының 4-бөлігі), ал сотталушы У. парақорлыққа делдал болғаны үшін (ҚК 368-бабының 1-бөлігі) айыпталған.

СОТТА НЕ АНЫҚТАЛДЫ

2024 жылғы наурызда сағат 01:30 шамасында сотталушылар М. және Т. «Тараз қаласының қаржы бөлімі» КММ басшысына сот үкімі бойынша жойылуға жататын 2 мың қорап (1 млн. қорап темекінің баламасы) мөлшерінде темекі өнімін алғаны үшін «Қаржы бөлімі» КММ статисті арқылы, делдал – сотталушы У.-ның (Жамбыл облысы бойынша МКД бас маманы) қатысуымен, 90,2 млн. теңге мөлшерінде пара сомасын берген.

Екі шенеунік сотталушылар жасаған іс-әрекеттердің заңсыздығын түсініп, Жамбыл облысы бойынша сыбайлас жемқорлыққа қарсы қызметке аса ірі мөлшерде пара беру фактісі бойынша арызбен жүгінді.

Осылайша, сотталушылар М. және Т.-ның қылмысы оларға байланысты емес мән-жайлар бойынша соңына дейін жеткізілген жоқ.

ТАРАПТАРДЫҢ ҰСТАНЫМЫ

Прокурор сотталушылар М. және Т.-ға – әрқайсысына 13 жыл, ал сотталушы У.-ға – 3 жыл мерзімге бас бостандығынан айыру жазасын тағайындауды сұрады. Сотталушылар өз кінәсін мойындамады.

ДӘЛЕЛДЕР

Сотталушылардың кінәсі жасырын тергеу әрекеттерімен, куәлердің айғақтарымен, мамандар мен сарапшылардың қорытындыларымен және басқа да заттай дәлелдемелермен дәлелденді.

СОТ ШЕШІМІ

Сот сотталушылар М. және Т.-нің әрекеттеріндегі ауырлататын мән-жайлар ретінде қылмыс жасаудағы ерекше белсенді рөлдерін, ал У.-дың іс-әрекетінде – ол қабылдаған антын бұзуын таныды.

Сот үкімімен сот сотталушыларға белгілі бір лауазымдарды атқару құқығынан өмір бойына айыра отырып, М.-ға – 10 жыл, Т.-ға – 9 жыл және У.-ға 3 жыл бас бостандығынан айыру жазасын тағайындады. Т.-ға жаза тағайындау барысында оның егде жасы мен денсаулық жағдайы ескерілді. Сондай-ақ, сотталушылар Т. және У. сот залынан күзетке алынды.

Үкім заңды күшіне енген жоқ.