Қазақстан Байқоңырды жалға беруші мәртебесінен бас тартып, ғарыш өнеркәсібінің әлеуетті қатысушысы болуға ұмтылуы керек. Бұл туралы сенатор Андрей Лукин айтты, деп хабарлайды Ulysmedia.kz.
ТОЛЫҒЫРАҚ
Лукин Қазақстанда бірегей және дара өнімдер шығаруға техникалық және технологиялық мүмкіндігі бар жабдықталған құрастыру-сынақ кешені арқылы аса жеңіл зымыран-тасығыш жасау қажеттігін атап өтті. Сонымен қатар, ол бұл кешенге мемлекеттік сатып алулар мен технологиялық процестер саласында артықшылықтар мен жеңілдіктер беруді ұсынды.
– Негізгі бағыттардың бірі ретінде университеттер мен стартаптардың қатысуымен шағын спутниктерді (CubeSat, микроспутниктер) жасау болуы мүмкін. Спутниктерді басқару орталығын кеңейтіп, Қазақстанды ғарыштық қызметтерді – өндіріс, ұшыру және технологиялық сүйемелдеу – көрсететін ел ретінде ілгерілету маңызды. Бұдан бөлек, "KazSat-3R" жобасына республикалық бюджеттен қосымша қаржыландыру түрінде қолдау қажет, – деп есептейді Лукин.
Сенатор ғарыш саласын дамытуға қатысты тәсілдерді түбегейлі қайта қарауға шақырады.
– Әлемдегі қазіргі жағдайды, шектеулі болса да тұрақты әлеуетті ескере отырып, біз өз назарымызды шоғырландырып, қолда бар тәжірибе мен артықшылықтарға сүйене отырып, нақты бағыттар бойынша прагматикалық іс-қимыл жоспарын ұсынуымыз қажет. Космостық держава – жалға беруші мәртебесінен бас тартып, ғарыш өнеркәсібінің нақты қатысушысына айналуымыз керек, – деп атап өтті ол.
Оның пікірінше, елде инженерлік-ғарыш факультеттерін ашып, тағылымдамаларды қолдау, ғылыми базаларды дамыту қажет.
– Алдыңғы қатарлы технологияларсыз тұрақты инновациялық экономиканы құру мүмкін емес, әсіресе ғарыш сияқты жоғары технологиялы салада, – деп қорытындылады Андрей Лукин.
БҰҒАН ДЕЙІН
Еске салайық, бұған дейін Ресей билігі Байқоңыр ғарыш айлағын пайдалануды мерзімінен бұрын тоқтатуды талқылап жатқаны белгілі болған еді.
