Актер Әнуар Нұрпейісов Астанада 23 мамырға жоспарланған жеке концертіне кедергі жасалғанын айтып, әлеуметтік желіде үндеу жариялады, деп хабарлайды Ulysmedia.kz.
НҰРПЕЙІСОВ НЕ ДЕЙДІ
Оның айтуынша, концерт билеттерінің көп бөлігі сатылып қойған.
Кешке маған концерт өтетін мекеменің арт-директоры хабарласып, олар белгісіз бір ведомстводан қоңырау алғанын айтты. Онда «электр желілеріне техникалық жұмыстар жүргізіледі, сондықтан жарық болмайды» делінген. Мен “онда концертті шам жағып өткізейік” дедім. Бірақ арт-директор “Мәселе жарыққа байланысты емес екенін, проблема сіздің ұстанымыңызда екенін түсініп отырсыз ғой” деп жауап берді, — деді актер.
БАСҚА АЛАҢДА ӨТКІЗБЕК БОЛҒАН
Нұрпейісов концертті басқа алаңда өткізбек болған. Алайда актердің бұл жоспары да жүзеге аспай қалған.
Досымның көмегімен басқа орын таптым. Барлық қатысушыларға соңғы сәтте мекенжайды жібереміз деп жоспарлап отыр едім. Бірақ біраз уақыттан кейін жаңа орын иелеріне ҰҚК-ден қоңырау түсіп, оларды “мейірімді түрде” концерттен бас тартуға шақырған. Егер көнбесе, салдары ауыр болатыны ескертілген, — деді ол.
“БІРЕУДІҢ БИЗНЕСІНЕ ЗИЯНЫМ ТИМЕСІН”
Ол концерттің ресми түрде өтпейтінін жариялап, бұл шешімінің себебін түсіндірді.
Біріншіден, мен концертімді тоқтатуға мәжбүрмін. Себебі ешкімнің кәсібіне зиян келтіргім келмейді. Концерт кезінде қандай да бір арандату болуы да мүмкін. Екіншіден, мен мына нәрсеге тағы көз жеткіздім: WhatsApp-та құпиялылық жоқ. ҰҚК біздің жеке хаттарымызды оқып отырғандарын анық көрсетті, — деді Нұрпейісов.
ҚЫСЫМ
Актер өзіне жасалып жатқан қысым жайында да ашық айтты.
Сіздер мені кинематография саласындағы барлық «қара тізімдерге» енгізіп қойдыңыздар. Жарнама берушілер менімен жұмыс істеуге қорқады. Ал стендап — шығармашылықтағы жалғыз табыс көзім еді. Енді соған да қысым көрсетіп отырсыздар. Бұл — арамдық. Бұл елді өркениетті елдер қатарына жақындатпайды, — деді ол.
ӘКІМДІК НЕ ДЕЙДІ
Бұл жайтқа қатысты Астана әкімдігінің ресми өкілдері жауап берді.
Қалалық әкімдікке аталған іс-шараны өткізуге қатысты ешқандай ресми өтініш түспегенін хабарлаймыз, делінген жауапта.
АКТЕР ЖАЙЛЫ
Актер Әнуар Нұрпейісов — қоғамдағы өткір әлеуметтік мәселелерді ашық айтып жүрген актер әрі комик. Бұл — оның шығармашылығына қысым жасалғанын алғаш рет айтып отырғаны емес. Мысалы былтыр Әнуар Нұрпейісов елордада концерттің тоқтатылғаны туралы айтып, бейнеүндеу жазған болатын. Актер кейінірек ұйымдастырушылармен бірге орынды өзгерту туралы шешім қабылдағанын, бірақ іс-шара біраз уақыттан кейін "қоңыраудан" соң тоқтатылғанын айтты.
