2024 жылдың күзінен бері ең ауқымды митинг Тбилисиде 214-ші күні өтті — шерушілер мерзімінен бұрын сайлау өткізіп, саяси тұтқындарды босатуды талап етті, деп хабарлайды Ulysmedia.kz.
29 маусым күні кешке Тбилисидің орталығындағы Руставели даңғылында соңғы айлардағы ең ірі демонстрация өтті. Бұл — қазіргі билікке қарсы тоқтаусыз жалғасып келе жатқан наразылықтың 214-ші күні. Наразылыққа сан жағынан рекордтық қатысушы жиналды. Халық тағы да парламент сайлауын мерзімінен бұрын өткізуді және саяси тұтқындарды босатуды талап етті.
Наразылық қозғалысы 2024 жылғы қарашада басталған еді — сол кезде премьер-министр Ираклий Кобахидзе Грузияның Еуроодаққа интеграция процесін алдағы төрт жылға тоқтататынын мәлімдеген болатын.
Жексенбідегі митингке азаматтық белсенділермен бірге адам құқықтарын қорғаушылар, оппозициялық партиялар мен түрлі қоғамдық ұйымдар қосылды. Парламент ғимараты алдында жиналған жұртшылыққа Грузияның бесінші президенті Саломе Зурабишвили сөз сөйледі. Ол саяси қысымға қарсы басты қару — ұлттық бірлік екенін айтып, халықты ынтымаққа шақырды.
«Барлық сұраққа жауап — бұл бірлік. Бірлік — ол жеңіс. Жеңіс сайлауға қатысу арқылы да, бойкотпен де, аштықпен де келмейді. Біз күресуге тиіс жалғыз майдан — ол бірлік үшін күрес», — деді Зурабишвили парламент алдына орнатылған сахнада.
Оның айтуынша, биліктің қоғамды бөлшектеуге бағытталған кез келген әрекеті сәтсіз аяқталады, егер халық тұтастығын сақтай білсе. Ол — осы митингте ресми түрде сөз сөйлеген жалғыз саяси лидер болды.
