Жаңа жасырын камералар қазақстандықтарға жаппай айыппұл салып жатыр

КОНТЕКСТ

4 шілдеден бастап Орал қаласында және облыс жолдарында жол қозғалысын бақылауға арналған 10 жаңа мобильді камера орнатылды. mgorod.kz мәліметінше, олардың бесеуі – "Кибер-шерифтерге" ұқсайтын Ekin Patrol жүйелері. Қалған бесеуі – жасырын бақылауға арналған X-Spotter камералары. Төрт камера арнайы белгісі мен маягы жоқ полицей көліктеріне орнатылған, ал біреуі – қалаішілік автобусқа қойылған. Бұл құрылғылар жылдамдықты арттыруды, дұрыс емес аялдауды және тоқтауды, қарсы жолаққа шығуды тіркейді. Қала ішінде де, сыртында да жұмыс істейді.

АЙЫППҰЛ

Камералар орнатылғаннан кейін жүргізушілер шағымдана бастады. Кейбірі шындыққа жанаспайтын бұзушылықтар үшін айыппұл алғанын айтты. Мысалы, Газель көлігінің жүргізушісіне 160 км/сағ жылдамдықпен жүргені үшін айыппұл келген. Тағы бір қыз жол кедергісінің үстімен 93 км/сағ жылдамдықпен жүргені үшін айыппұл алыпты. Ал ВАЗ жүргізушісіне қала ішінде 125 км/сағ жылдамдықпен жүрген деген айып тағылған.

ШАҒЫМ

Батыс Қазақстан облыстық Полиция департаментіне X-Spotter жүйесінің тіркеуіне келіспейтін жүргізушілерден 38 шағым түсті. Барлық өтініштер жоспарлы түрде қаралуда. Әрбір шағым бойынша "Алатау Смарт Технолоджи Қазақстан" ЖШС-не ресми сұрау жіберілген.

– Пайдалануға берер алдында әрбір Ekin X-Spotter жүйесі көлікте калибрлеуден және баптаудан өтеді. Қолданыстағы заңнамаға сәйкес, жол қозғалысына жасырын бақылау жүргізуге тыйым салынбаған. Мобильді автоматты бақылау жүйелері іске қосылған сәттен бастап барлығы 1244 жол ережесін бұзу дерегі анықталды. Тексеру нәтижесінде кейбір бұзушылықтардың дұрыс тіркелмегені расталып, олар бойынша айыппұлдар жойылды. Жалпы алғанда, 38 айыппұлдың күші жойылды, – делінген полиция департаментінің хабарламасында.

АЙЫППҰЛДАРДЫ ТӨЛЕМЕУГЕ БОЛАДЫ

Ведомство мәліметінше, айыппұлды төлемеуге болады. Ол үшін бақылау жүйесінің дұрыс жұмыс істемегенін дәлелдейтін дерек қажет. Қателіктің себебін қызмет көрсететін компания анықтайды, ол құрылғыны тексеріп, ақау болған жағдайда түзетеді. Егер жүргізуші айыппұлмен келіспесе, БҚО Полиция департаментінің әкімшілік практика бөлімінен бейнетіркеуді көре алады.