Сатқалиев «Самұрық-Қазынаның» ұлттық компанияларын министрліктерге беруді құптамай отыр

«Қорды сақтап қалуда негізгі мәселелердің бірі ретінде – Ұлттық компанияларды бейінді министрліктерге беру болып отыр. Алайда әлемдік тәжірибе көрсетіп отырғандай, бұл тетік жемқорлық тәуекелдерін екі есе өсіріп, тиімділікті азайтады. Инвестициялық климатты нашарлатады», - деп жазды ол әлеуметтік желідегі парақшасында.

Оның хабарлауынша, қордың болуының өзі тауарлық кірістерді экономиканың тұрақты болашақ өсіміне айналдырып отыр. Сонымен қатар экономиканың нақты секторына әртараптандыру және инвестициялау арқылы ұлттық байлықты арттыруда нарықтық тәсілдерді қолдануды қамтамасыз етеді. ҚҰБ мен ҚРҰҚ-дан айырмашылығы, валюталық резервтер мен шикізат секторынан түсетін кірістерді негізінен бағалы қағаздарға инвестициялау арқылы консервативті түрде басқарады. Дағдарысқа қарсы басқару мен нарыққа араласу үшін өтімді қаражатты қамтамасыз етуге назар аударады.

«Бұл амал валюта бағамының өсуіне, түсуіне, құбылу циклі ықпалын, шикізат тауарлары бағасының құбылмалылығына азайтып, экономиканы шикізат кезеңінен кейінгі сатыға дайындайды», - дейді ол.

Оның айтуынша, қор келесі функционалдарды өзінде сақтап қалуы керек:

• Стратегиялық активтерді басқару;
• Қазақстан Республикасы Үкіметінің экономиканы әртараптандыру, ШОБ және отандық тауар өндірушілерді қолдау жөніндегі агенті болу;
• Экономиканың инфрақұрылымдық және шикізаттық емес секторларына инвестициялар, нақты жобалар мен жұмыс орындарын құру;
• Жеке секторға қолжетімді емес шарттармен жобаларды қаржыландыруды қамтамасыз ету арқылы жаңа нарықтарды құру;
• Әлеуметтік маңызы бар жобаларды жүзеге асыру.