Германия канцлері Фридрих Мерц Украина мен Ресей президенттері Владимир Зеленский мен Владимир Путиннің кездесуін өткізу ықтималдығы төмен екенін мәлімдеді, деп хабарлайды Ulysmedia.kz.
Германия мен Францияның ұстанымы
Мерцтің айтуынша, Германия мен Франция үкіметтері Украинадағы соғыс мәселесін талқылауды жалғастырады, алайда «Зеленский мен Путиннің кездесуі өтпейтіні айқын» деген позицияны негізге алады. Ол бұл мәлімдемесін Францияның Безансон қаласында, ел президенті Эммануэль Макронмен кездесудің алдында жасады.
Канцлер атап өткендей, Дональд Трамп пен Владимир Путиннің өткен аптадағы келісіміне қарамастан, Киев пен Мәскеу тікелей диалогқа жақындай қойған жоқ.
Трамптың пікірі
АҚШ президенті Дональд Трамп бұған дейін де екі ел көшбасшыларының кездесуіне күмән келтірген еді. Ол «диалог болады ма, білмеймін, бірақ соғысты бәрібір тоқтатуға болады, тек жақын арада емес» деген пікірін білдірген. Америкалық БАҚ-тың жазуынша, Трамптың сөзінше, Путин Зеленскиймен кездескісі келмейді, себебі ол оған «ұнамайды». Дегенмен Трамп «мен де кейде ұнатпайтын адамдармен кездесуге мәжбүр боламын» деп қосты.
Мерцтің ескертуі
Жақында Фридрих Мерц Берлиннің «бейбітшілікке кез келген шартпен келісуге дайын емес» екенін қадап айтты. Оның ойынша, Киевтің капитуляциясы Мәскеуге жаңа соғысқа дайындалуға уақыт беріп қояды.
