Львов қаласында Украина Жоғарғы Радасының бұрынғы төрағасы Андрей Парубий қаза тапты, деп хабарлайды Ulysmedia.kz.
МӘН-ЖАЙ
Бұл туралы алғаш болып БАҚ дереккөздерге сілтеме жасап жазды. Кейіннен саясаткердің өлімін Украина президенті Владимир Зеленский растады.
ДӘЙЕКСӨЗ
– Украина ішкі істер министрі Игорь Клименко мен бас прокурор Руслан Кравченко Львовтағы сұмдық кісі өлтірудің алғашқы белгілі жайттары жөнінде баяндады. Андрей Парубий қаза тапты. Оның туған-туыстары мен жақындарына көңіл айтамын. Қажетті күш пен құралдардың бәрі тергеу мен қылмыскерді іздеуге жұмылдырылды, – делінген хабарламада.
Журналист Виталий Глаголаның мәліметінше, шабуылды Glovo қызметінің курьер сөмкесін асынған, электровелосипедпен жүрген ер адам жасаған. Ол, алдын ала деректер бойынша, тапаншадан сегіз рет оқ атып, қаруды сөмкесіне салып, оқиға орнынан жасырынған.
Андрей Парубий 2016 жылдан 2019 жылға дейін Жоғарғы Раданы басқарған. Бұған дейін ұзақ жылдар бойы парламент депутаты болды. 2014 жылы бірнеше ай бойы Украина Ұлттық қауіпсіздік және қорғаныс кеңесінің хатшысы қызметін атқарып, кейін сол кездегі президент Петр Порошенкомен келіспеушілікке байланысты отставкаға кеткен.
