Алматылық "Қайрат" футбол клубы "Реал Мадридке" қарсы матчқа билет сату басталды деген ақпаратты жоққа шығарды, деп хабарлайды Ulysmedia.kz.
МӘН-ЖАЙ
Клубта билеттер туралы ақпараттың жалғыз ресми дереккөздері – клубтың ресми сайты мен “Қайраттың” әлеуметтік желідегі ресми аккаунттары екені айтылды.
Ал билет сатылымға шығатын күн мен бағасы әлі бекітілмеген.
— Әлеуметтік желілерде таралып жатқан “Қайрат” — “Реал Мадрид” УЕФА Чемпиондар лигасы матчының билетін сату немесе алдын ала брондау жайлы ақпарат — шындыққа жанаспайтын, жаңсақ хабарлама. Жанкүйерлерден бөгде хабарландыруларға сенбеулерін және билетті бейресми арналар арқылы сатып алмауларын қатаң түрде сұраймыз, – делінген мәлімдемеде.
БҰҒАН ДЕЙІН
Еске салайық, бұған дейін 2025-26 маусымындағы Чемпиондар лигасының топтық кезеңінде алматылық "Қайраттың" ойын күнтізбесі жарияланды.
Алғашқы матчын команда 18 қыркүйекте қонақта португалиялық «Спортингке» қарсы өткізеді. Ал екі аптадан кейін, 30 қыркүйекте Алматыда әйгілі мадридтік «Реалмен» ойын өтеді.
Одан кейін “Қайрат” 21 қазанда өз алаңында кипрлік “Пафосты” қабылдайды, ал 5 қарашада сырт алаңда миландық “Интерге” қарсы ойнайды. 26 қарашада алматылықтар Копенгагенге қонаққа барады, 9 желтоқсанда Алматыда гректің “Олимпиакосымен” кездеседі.
2026 жылы команда тағы екі матч өткізеді: 20 қаңтарда Алматыда бельгиялық “Брюггемен”, ал 28 қаңтарда сырт алаңда ағылшынның “Арсеналына” қарсы ойнайды.
Осылайша, “Қайрат” өз алаңында жарты матчын өткізіп, оның ішінде әлемнің алпауыт клубтары – Real Madrid пен Olympiacos-ты қабылдайды.
