Украина президенті Владимир Зеленский бұрынғы Жоғарғы Рада төрағасы Андрей Парубийдің өлімі туралы айтты, деп хабарлайды Ulysmedia.kz.
МӘН-ЖАЙ
Зеленскийдің айтуынша, ішкі істер министрі мен бас прокурор тұрақты түрде есеп беріп отыр. Ол қылмыстың “мұқият ұйымдастырылғанын” айтқан.
– Андрей Парубийдің өліміне қатысты жағдайлар тергеліп жатыр. Барлық қажетті ресурс жұмылдырылды. Өкінішке қарай, қылмыс мұқият ұйымдастырылған. Бірақ оны ашу үшін барлық шара қолданылып жатыр. Мен Василий Малюкпен де сөйлестім. Украина Қауіпсіздік қызметі де тергеумен айналысып жатыр. Халыққа тексерілген ақпаратты жедел жеткізуді тапсырдым, – деп жазды ол.
Украина президенті Андрей Парубийдің отбасына және достарына көңіл айтты.
КОНТЕКСТ
Журналист Виталий Глаголаның мәліметінше, шабуылды Glovo қызметінің курьерлік сөмкесі бар электрвелосипед мінген ер адам жасаған. Ол, болжам бойынша, тапаншадан сегіз рет оқ атып, қаруды сөмкесіне тығып, оқиға орнынан қашып кеткен.
Андрей Парубий 2016-2019 жылдары Жоғарғы Рада төрағасы болды, оған дейін көп жыл депутаттық мандат иеленген. 2014 жылы бірнеше ай бойы Украина Ұлттық қауіпсіздік және қорғаныс кеңесінің хатшысы қызметін атқарып, кейін ол қызметтен сол кездегі президент Петр Порошенкомен арадағы жанжалдан соң кеткен.
