Заңгер қауіпті мобильді аударымдар туралы айтты. Мұндай аударымдар, маманның пікірінше, салық органдарының назарын міндетті түрде аударады, деп хабарлайды Ulysmedia.kz.
Толығырақ
Заңгер Шыңғыс Оралбаев қазақстандықтарды салық органдарына шақыртуға себеп болуы мүмкін мобильді аударымдардан сақ болуға шақырды, деп жазады Digital Business. Кейбір жағдайда мәселе тіпті жақын туыстардан келген аударымдарға да қатысты болуы мүмкін.
Аударым түрлері
Ең алдымен, оның айтуынша, қазақстандықтар барлық аударымдарға түсініктеме жазып отыруы қажет.
– Егер ақша аударымын ешқандай белгісіз жасасаңыз, салық органдары оның мақсатын өз бетінше түсіндіре алады. Тіпті туыстар арасында болса да «сыйлық», «қарызды қайтару», «шұғыл шығындарға» деп жазған дұрыс. Бұл артық сұрақтардың алдын алып, тексеру тағайындалған жағдайда түсіндіруді жеңілдетеді, – дейді ол.
Жеке картаны бизнес үшін пайдалану
– Егер жеке адамның картасына клиенттерден, серіктестерден немесе «белгісіз» адамдардан тұрақты түрде ақша түсіп тұрса – тексеруге дайын болыңыз. Тіпті шағым болмаса да, банк деректерді өздігінен мемлекеттік кірістер комитетіне бере алады, – деп ескертті заңгер.
Соманы бірнеше бөлікке бөлу
– Мұны да салық органдары көреді және жасанды түрде бөлшектеу деп бағалайды. Бір адамнан 990 мың теңгені үш бөлікпен аударсаңыз бұл күмәнді әрі өте күдік тудырады, – деді спикер.
Бір адамға тұрақты қайтарылатын аударымдар
Ақшаны үнемі бір адамға аударып, кейін қайтарып алу да қолма-қол ақшаға айналдыру схемасы болып көрінуі мүмкін.
- Әсіресе сомалар бірдей және қайталанып отырса, – деп түйіндеді Оралбаев.
