Астанада британдық Cardiff University филиалы ашылды. Ұлыбританияда университеттің өзі қысқарту мен қаржылық қиындықтарды бастан кешіп отырса, Қазақстанда оған барынша қолайлы жағдай жасалып отыр. Болашақ кампус ғимаратын жеке қор салады, ал жер телімі билік тарапынан тегін берілген, деп хабарлайды Ulysmedia.kz.
МӘН-ЖАЙ
Ғылым және жоғары білім министрі Саясат Нұрбектен филиалды ашуға қанша қаражат жұмсалғаны сұралғанда, министрдің реакциясы бұл сұрақтың қолайсыз болғанын аңғартты. Министр бюджеттен бір теңге де шығындалмағанын айтты. Алайда кейін филиалда 350 студент оқитынын, олардың 300-і мемлекеттік грант есебінен екенін айтты.
Бір грант құны – 15 мың доллар. Қарапайым есептен сөз кемінде 4,5 миллион доллар немесе шамамен 2,43 миллиард теңге көлеміндегі мемлекеттік бюджет қаражаты туралы болып отырғанын байқауға болады.
КОНТЕКСТ
Бұған дейін британ депутаттары елдің ең көне университеттерінің бірі шамамен 400 қызметкерді қысқартып, бірнеше курсты жабуды жоспарлап отырғанына наразы болған еді, бірақ соған қарамастан Қазақстанда жаңа филиал ашпақ. Осы даулы жағдайды Ulysmedia.kz тілшісі зерттеп көрді.
