Израиль авиациясы Газада палестиналық босқындарға арналған БҰҰ агенттігінің (UNRWA) үш мектебіне әуе соққысын жасады. Бұл мектептерде айлар бойғы шабуылдан қашқан мыңдаған бейбіт тұрғын паналап жатқан еді, деп хабарлайды Ulysmedia.kz Anadolu Agency-ге сілтеме жасап.
ТОЛЫҒЫРАҚ
Куәгерлердің айтуынша, соққылар Әл-Шати босқындар лагеріндегі Сит-Сура, Әл-Алия және Шахейбер мектептеріне бағытталған. Әскерилер алдын ала «соққы жасалатынын» ескертіп, эвакуациялауды талап еткен, бірақ дайындалуға уақыт тым аз болған.
Куәгерлердің сөзіне қарағанда, шабуыл кезінде адамдардың арасында хаос пен дүрбелең орнаған: отбасылар тамақтарын, төсек-орындарын, құжаттарын тастап, асығыс көшеге жүгіріп шыққан.
Сондай-ақ соққылар қаланың батысындағы Әл-Фируз Тауэрс ауданындағы көпқабатты тұрғын үйге және Газаның оңтүстігіндегі Әл-Синаа көшесіндегі бір үйге жасалған.
КОНТЕКСТ
Газадағы соғыс салдарынан Израильдің дипломатиялық оқшаулануы күшейіп жатыр. Тіпті оның ең жақын одақтастары да секторды қиратып жатқан әскери операцияны сынға алып отыр.
Қақтығыс 2023 жылдың 7 қазанында палестиналық қарулы топтардың Израильдің оңтүстігіне жасаған шабуылынан басталған еді. Сол кезде шамамен 1 200 адам қаза тауып, 251 адам тұтқынға алынып, Газада ұсталған.
Содан бері, жергілікті дәрігерлердің мәліметінше, анклавта 64 мыңнан астам палестиналық қаза тапқан. Аймақтың басым бөлігі қирап, халық ауыр гуманитарлық дағдарысты бастан кешіп жатыр.
Израильдің өз ішінде де соғысты дипломатиялық жолмен тоқтатуға шақыратын үндеулер күшейіп келеді. Бұл қозғалыстың алдыңғы шебінде тұтқында отырғандарды босатуды талап етіп жүрген олардың отбасылары тұр. Қазіргі уақытта 48 адам әлі де тұтқында қалып отыр.
