Қоғам белсендісі Санжар Боқаев Үлкен Алматы өзенінің жағалауымен жүріп өтіп, жүргізілген реконструкцияны бағалады, деп хабарлайды Ulysmedia.kz.
ТОЛЫҒЫРАҚ
Белсенді жұмыс жүріп жатқан жерлерді аралап, қарапайым қаламмен сапаны тексерді. Кадрларда оның жиектің әрі сылақтың бір бөлігін оңай қырып алғаны көрінеді. Сондай-ақ ол гидротехникалық нысандарды орнату да сапасыз екенін көрсеткен, жарықтарды жабу үшін жұмысшылар монтаж көбігін пайдаланған. Оның біраз бөлігі өзен арнасына түсіп кеткен. Жұмыстың сапасына жергілікті тұрғындар да шағымданған.
– Әкімдік мұндай жұмысты қалай қабылдап жаты? Актілерге қол қойып қойғансыздар, қандай актілер, не істеп отырсыздар?! Бұл – қылмыстық іс. Бұл барып тұрған қылмыстық іс, – деді Боқаев.
Белсенді әкімдікке кәсіпкерлерді шақырып, реконструкцияны өздері жасауға мүмкіндік беруді ұсынды.
КОНТЕКСТ
Еске салайық, жуырда қоғам белсендісі Санжар Боқаев бейнежазба түсіріп, онда түн жамылған бейтаныс адамдардың Үлкен Алматы өзенінің жағалауынан гранит плиталарды жасырын әкетіп жатқанын көрсетті. Плиталар кейін құлпытас дайындайтын цехқа жеткізілген.
Ulysmedia.kz тілшісі осы реконструкция үшін кім жауапты екенін және бұл іске Досаевтың қандай қатысы барын еске салуды жөн көрді.
