Алматы облысында құнды жер учаскелері мемлекетке қайтарылды, деп хабарлайды Ulysmedia.kz.
ТОЛЫҒЫРАҚ
Алматы облысында уәкілетті органдардың, соның ішінде Жер ресурстарын басқару департаменті мен Балқаш-Алакөл бассейндік инспекциясының қатысуымен жүйелі және кезең-кезеңмен жүргізілген жұмыс нәтижесінде 15 жыл бұрын жеке пайдалануға берілген құнды жер учаскелері мемлекет меншігіне қайтарылды.
– Бұл бағыттағы жұмыстар кейінгі бірнеше жылда жоспарлы түрде атқарылып келеді. Мәселен, кейінгі үш жыл ішінде мемлекетке жалпы құны 6,1 млрд теңге болатын 83 мың гектар жер қайтарылды. Оның ішінде 21 мың гектар, бағасы 1,6 млрд теңге болатын жерлер бұрынғы жоғары лауазымды шенеуніктердің, олардың туыстарының және Forbes тізіміне енген тұлғалардың иелігінде болған, – деп хабарлады Алматы облысының прокуратурасы.
Атап айтқанда, прокуратураның талап-арызы бойынша 2025 жылғы мамыр айында Құлыбаевтар әулетіне тиесілі Қапшағай жағалауындағы жер учаскесі мемлекетке қайтарылды. Сондай-ақ депутаттық сауалда көрсетілген тағы 9 гектар жағалаулық аумақ та мемлекет меншігіне өтті.
КЕЛЕСІ ҚАДАМДАР
Қазіргі таңда Іле ауданындағы жерлерге қатысты жұмыс жалғасып жатыр. Тексеру нәтижелері туралы халыққа қосымша ақпарат беріледі.
