2024 жылдың жазында және күзінде Украина Қарулы Күштерінің Курск облысындағы шабуылы кезінде кем дегенде 60 ресейлік мерзімді әскери қызметкер қаза тапты. Бұл туралы «Маңызды оқиғалар» басылымы 2025 жылдың 3 қазанында хабарлады. Басылым деректерді БАҚ материалдарына, қаза болғандардың туыстарының әлеуметтік желідегі жазбаларына және мұрагерлік істер тізіміне сүйене отырып жариялаған, деп хабарлайды Ulysmedia.kz.
БІРІНШІ АПТАДА ЖАППАЙ ҚАЗА: ЖЕТІ КҮН ІШІНДЕ ЖАРТЫСЫ ЖОҒАЛДЫ
Украин шабуылы 6 тамызда басталғаннан кейінгі алғашқы жеті күн ішінде 60 сарбаздың жартысына жуығы мерт болған. Атап айтқанда, 13 және 14 тамызда Веселое ауылындағы мектепке жасалған шабуыл салдарынан бірден жеті сарбаз көз жұмды. Бұл ауыл Украина шекарасынан небәрі 3,5 шақырым жерде орналасқан, ал сарбаздарды сонда Ресей әскери басшылығы орналастырған.
ҚЫРКҮЙЕКТЕГІ ҚАНДЫ СТАТИСТИКА: ТАҒЫ 20 САРБАЗ ҚАЗА ТАПТЫ
Қыркүйек айында тағы кем дегенде 20 мерзімді әскери қызметкердің өлімі тіркелген. Қаза тапқандар Ресейдің 34 өңірінен шақырылған. Олардың ішінде Краснодар және Краснояр өлкелерінен – 5 адамнан, Алтай өлкесінен – 4 адам, ал Ямало-Ненец автономды округі, Коми, Бурятия және Дағыстаннан – 3 адамнан бар. Орташа жасы – шамамен 20.
ІЗ-ТҮЗСІЗ ЖОҒАЛҒАНДАР: 60-ТАН АСТАМ САРБАЗ ТАБЫЛМАЙ ЖАТЫР
Басылымның мәліметінше, Курск облысында тағы 60-тан астам мерзімді әскери қызметкер із-түзсіз жоғалғандар қатарында тіркелуі мүмкін. Бұл деректер ресми түрде расталмағанымен, туыстары мен еріктілердің жинаған ақпараттарына негізделген.
