Израиль әскері Газа секторынан ішінара шегініп, жаңа демаркациялық сызықтар бойында позицияларды иелене бастады, деп хабарлайды Ulysmedia.kz.
ИЗРАИЛЬ МЕН ХАМАС АРАСЫНДАҒЫ АТЫС ТОҚТАТУ РЕЖИМІ КҮШІНЕ ЕНДІ
Израиль мен палестиналық радикалды исламшыл ХАМАС қозғалысы арасындағы атыс тоқтату режимі жергілікті уақыт бойынша 12:00-де күшіне енді. Бұл туралы 10 қазан күні Израиль Қорғаныс армиясы хабарлады.
Times of Israel басылымының мәліметінше, Израиль әскері келісімге сәйкес жаңа шекаралар бойында орналасып жатыр. Алғашқы әскери бөлімдер түнде Газадан шыққан. Кейбір жағалаудағы аудандарда шегіну артиллериялық атыс және әуе шабуылдарымен сүйемелденген.
СОҒЫСТАН КЕЙІН ЖОЙЫЛҒАН АУДАНДАРҒА ТҰРҒЫНДАР ҚАЙТА ОРАЛА БАСТАДЫ
Reuters агенттігі кейбір тұрғындардың екі жылдық соғыстан кейін толық қираған аудандарына қайта оралғанын хабарлады.Израиль армиясы Газадағы кейбір аудандардың әлі де "өте қауіпті" екенін ескертті.
АҚШ президенті Дональд Трамп ұсынған Газа жоспарының алғашқы кезеңі израильдік тұтқындарды палестиналықтармен алмастыруды көздейді.
Израиль ФАТХ қозғалысына қатысы бар 11 тұтқынның орнына ХАМАС-тың 11 мүшесін босатады, олардың тоғызы өмір бойына сотталған. Сонымен қатар, Израиль 250 ұзақ мерзімге сотталған палестиналықты және 2023 жылдың 7 қазанынан бері ұсталған 1700 адамды босатуға келісті.
ТЕРАКТ ҚҰРБАНДАРЫНЫҢ ОТБАСЫЛАРЫ БОСАТУҒА ҚАРСЫ ШЫҒЫП ЖАТЫР
Израильдегі теракт құрбандарының туыстары ХАМАС мүшелерін босатуға қарсы. Олар босатылатындардың толық тізімін жариялауды талап етуде.
Түркия Қорғаныс министрлігі әскерилердің Газаға бейбітшілік миссиясымен баруға дайын екенін мәлімдеді.
Израиль премьер-министрі Биньямин Нетаньяху Газада 20 тұтқын тірі, 28-і қаза тапқанын айтты. ЦАХАЛ күштері ХАМАС толық қарудан айырылғанша Газада қалатынын мәлімдеді.
ГЕРМАНИЯ ГАЗА ЖОСПАРЫН ҚОЛДАУҒА 29 МИЛЛИОН ЕВРО БӨЛЕДІ
Германия канцлері Фридрих Мерц Газа жоспарын жүзеге асыруға жан-жақты қолдау көрсететінін мәлімдеді. Алайда бундесвер сарбаздары бейбітшілік миссиясына қатыспайды. Германия палестиналық бейбіт тұрғындарға 29 миллион еуро бөлмек.
2023 жылдың 7 қазанында ХАМАС Израильге шабуыл жасап, 1200 адамды өлтіріп, 250 тұтқынды Газадағы секторға алып кеткен. Бұл оқиға Таяу Шығыстағы қақтығыстың жаңа кезеңін бастады.Израиль ХАМАС-қа қарсы соғыс жариялап, Газа секторына әуе және жерүсті шабуылдарын бастады. ХАМАС бақылауындағы денсаулық сақтау министрлігі 67 мыңнан астам палестиналықтың қаза тапқанын, 169 мыңнан астамының жараланғанын мәлімдеді. Алайда бұл статистиканың нақты құрамы белгісіз.Қыркүйек айының соңында Вашингтонда өткен кездесуде АҚШ президенті Дональд Трамп Газа бойынша бейбіт жоспар ұсынды. Израиль келісім берді, ал ХАМАС өкілдері қазан айының басында кейбір тармақтармен ішінара келісті. 6 қазанда Мысырда екі тараптың делдал арқылы алғашқы келіссөздері өтті.
