Еурокомиссия Украинаға қолдау көрсету мақсатында Euroclear депозитарийінде бұғатталған 140 млрд еуро ресейлік активтерге қосымша ретінде Ресейдің жеке банктік шоттарындағы 25 млрд еуроны пайдалануды көздеп отыр, деп хабарлайды Ulysmedia.kz.
Еуропалық Одақ Украинаға шамамен 140 млрд еуро көлемінде пайызсыз несие беру мүмкіндігін талқылауда. Бұл қаражат Еуропада бұғатталған Ресей Орталық банкінің активтері есебінен ұсынылмақ. Сонымен қатар, Еурокомиссия (ЕК) ЕО аумағындағы жеке банктік шоттарда жатқан 25 млрд еуроны да осы мақсатта пайдалану мүмкіндігін зерттеуді жоспарлап отыр. Бұл туралы 17 қазан, жұма күні Politico басылымы хабарлады.
«Репарациялық несие бастамасын ЕО аумағындағы басқа да бұғатталған активтерге тарату мүмкіндігін қарастыру қажет», – делінген ЕК-нің 17 қазандағы тұрақты өкілдер кездесуіне дейін ЕО елдеріне таратқан құжатында.
Құжатта «репарациялық несие тәсілін мұндай активтерге қолданудың құқықтық мүмкіндіктері әлі толық бағаланбағаны» атап өтілген.
«Мұндай бағалау келесі қадамдар туралы шешім қабылданбас бұрын жүргізілуі тиіс», – делінген онда.
ЕО көшбасшылары Украинаға арналған репарациялық несие бастамасын кеңінен талқылап, Еурокомиссияға тиісті ұсыныс әзірлеуді тапсырмақ.
Бұл ұсыныс жақын арада жарияланып, оны жүзеге асыру үшін қажетті қаржылық механизмдер бойынша одан әрі келіссөздер жүргізуге негіз болмақ. Қаржы министрлері бұл мәселені қарашадағы келесі отырыста егжей-тегжейлі талқылайды.
Бұғатталған активтердің басым бөлігі Бельгиядағы Euroclear деп аталатын қаржылық депозитарийде сақталған.
УКРАИНА ҚОРҒАНЫСЫН ҚОЛДАУҒА АРНАЛҒАН
«ЕО-ның Euroclear алдындағы міндеттемелерін тұрақты түрде орындауы үшін сенімді кепілдік және өтімділік құрылымын құру қажет», – делінген Politico танысқан құжатта. «Осы мақсатта мүше мемлекеттерден Еуроодаққа екіжақты кепілдік жүйесін құру ұсынылады», – деп түсіндіріледі құжатта.
2028 жылдан басталатын ЕО-ның келесі жеті жылдық бюджеті ұлттық кепілдіктерді «қаржылық резерв аясында жеткілікті қамтумен» қабылдайды. Бұл резерв Брюссельдің өз міндеттемелерін орындауына кепілдік береді.
Несие берілгеннен кейін қаражат Украинадағы қорғаныс технологиясы мен өнеркәсіптік базаны дамытуға, оны еуропалық қорғаныс өнеркәсібіне интеграциялауға, сондай-ақ елдің ұлттық бюджетін қолдауға бағытталады. Бұл ретте тиісті шарттардың сақталуы талап етіледі, деп мәлімдеді Брюссельде.
Еурокомиссияның деректеріне сәйкес, Ресейдің Украинаға қарсы соғысына байланысты ЕО аумағында Ресей Орталық банкінің шамамен 200 млрд еуро активтері бұғатталған. Бұл қаражаттан түскен пайыздық табыс Украинаға қару-жарақ пен оқ-дәрі жеткізуді қаржыландыруға пайдаланылып жатыр.
