Шымкентте Ресей әскерінің сапында соғысқан қазақстандыққа үкім шығарылды, деп хабарлайды Ulysmedia.kz.
Келісім және соғысқа қатысу
Іс материалдарына сәйкес, Максим Малахов 2023 жылы Ресей Қорғаныс министрлігімен келісімшартқа қол қойған. Ол алдымен Иловайск қаласында екі ай әскери дайындықтан өтіп, кейін «Донецк халық республикасы» деп аталатын аумақтағы Новодонецкое ауылында ұрыс аймағына бірнеше рет барған.
2024 жылдың наурызында Малахов келісімшартты ұзартудан бас тартқан соң, «ефрейтор» шенінде әскери қызметтен босатылған.
Қазақстан аумағына оралған ер адам «Жайсан» өткізу пунктінде ұсталды. Оның үстінен 210 мың рубль (шамамен 1,4 млн теңге) табылған. Тергеу мәліметінше, бұл — келісімшарт бойынша қалған ақшаның бөлігі.
Сотта Малахов өз кінәсін мойындап, соғысқа «жауынгерлік тәжірибе жинау мақсатында» барғанын айтқан.
Судья оның айыбын мойындап, шын жүректен өкінгенін жеңілдететін мән-жай ретінде ескеріп, 4,5 жылға бас бостандығынан айыру жазасын тағайындады.
Қазақстан заңнамасы бойынша шетелде соғыс қимылдарына қатысу — ауыр қылмыс.
Егер азамат шетелде соғысқа жалақысыз, бірақ өз еркімен қатысса, оған 5 жылдан 9 жылға дейін түрме жазасы қарастырылған.
Ал ақы үшін соғысқан жалдамалы деп танылған жағдайда, 7 жылдан өмір бойына дейін бас бостандығынан айырылады, азаматтығынан айырылып, мүлкі тәркіленуі мүмкін.
