Өскемен тұншығып тұр, экологтар көңіл көншітпейтін қорытынды жасады, деп хабарлайды Ulysmedia.kz.
ТОЛЫҒЫРАҚ
Экологтар Өскемен қаласында ауадағы күкірт диоксиді мен күкіртсутегінің шекті рұқсат етілген мөлшерден асып кеткенін растады. Бұл туралы yk.kz басылымы Шығыс Қазақстан облысы экология департаментінің мәліметіне сілтеме жасап жазды.
– Бірінші күні өнеркәсіптік кәсіпорындардың санитарлық-қорғау аймағында, екінші күні – тікелей зауыттардың өз аумағында мобильді құрылғылармен өлшеу жүргіздік. Нәтижесінде атмосфералық ауада күкірт диоксиді мен күкіртсутегінің концентрациясы нормадан асып кеткені анықталды. Бұған себеп – желдің болмауы, түнгі уақытта ауа температурасының күрт төмендеуі және соның салдарынан таңертең тұманның түзілуі. Оның үстіне қалада екі өзен бар, – деді облыстық экология департаментінің басшысы Әсет Сүлейменов.
Сонымен қатар, ол ірі өнеркәсіп орындары бекітілген нормативтер шегінде жұмыс істеп жатқанын, яғни ресми түрде экологиялық нормалар бұзылмағанын айтты.
КОНТЕКСТ
Соңғы бірнеше күн бойы Өскемен қаласында ауадағы ең қауіпті заттардың деңгейі шамадан тыс жоғары болып тұр. Соған қарамастан, балаларды онлайн оқытуға көшіру туралы шешім қабылданбаған еді.
Тек кеше кешкісін ғана 24 қазан күні оқушыларға мектепке бармауға рұқсат берілгені хабарланды.
