«Самұрық-Қазына» ұлттық әл-ауқат қоры жанындағы қоғамдық кеңестің төрағасы Болат Жәмішев ұлттық компания басшысын шынайы жағдайды көркемдеп көрсетуге тырысқаны үшін сынға алды. Сонымен қатар, ол бүкіл мұнай-газ саласы үшін стратегиялық маңызы бар жобаның жақын уақытта аяқталмайтынын мойындатты, деп хабарлайды Ulysmedia.kz.
АУҚЫМДЫ ЖОСПАРЛАР
«Самұрық-Қазына» қорының қоғамдық кеңесі отырысында «QazaqGaz» ұлттық компаниясының төрағасы Әлібек Жамауов Қашаған кен орнында салынып жатқан газ өңдеу зауыттарының жай-күйі туралы баяндады.
Компания екі зауыт салуды жоспарлап отыр – бірі жылына 1 млрд текше метр газ, екіншісі 2,5 млрд текше метр газ өндіруге арналған. Үлкен қуаттағы зауыт бойынша әзірге тек жоспар мен болжам бар, ал 1 млрд куб көлеміндегі нысанның құрылысы нақты жүріп жатыр.
– Қашағанда жылына 1 млрд текше метр газ өндіретін зауыт салу жобасы стратегиялық маңызы бар жоба. Ол дайын өнім шығару көлемін ұлғайтып, түйіршіктелген күкірт пен сұйытылған мұнай газы секілді көмірсутек фракцияларын өндіруге мүмкіндік береді, – деді Жамауов.
Ол жобаның бас мердігері соңғы уақытта жұмысты жандандырып, құрылыстың қарқынын арттырғанын айтты.
– Құрылыс алаңында шамамен екі мың жұмысшы мен маман еңбек етіп жатыр, 330-дан астам арнайы техника жұмылдырылған. Ірі жабдықтардың монтажы аяқталды, іргетастарды құю жұмысы аяқталуға жақын. Металл конструкцияларын тұрғызу, жабдық орнату және резервуарлар жинау жұмыстары басталды, – деді ол.
Жамауовтың айтуынша, құрылысты аяқтау 2026 жылдың соңына жоспарланған.
ТҮСІНДІРМЕДЕГІ ҚАЙШЫЛЫҚТАР
Алайда, кейін белгілі болғандай, Қашағаннан өндірілген газдың 2027 жылдан бастап тікелей сол жерде өңделуі екіталай.
– Жобаны аяқтау мерзімі – 2026 жылдың желтоқсаны ма? – деп сұрады қоғамдық кеңес төрағасы Болат Жәмішев.
– Құрылысты аяқтап, кейін іске қосу мен реттеу жұмыстарына көшеміз, – деп нақты жауап беруден жалтарды «QazaqGaz» басшысы.
– Бірақ слайдта жобаны толық аяқтау және пайдалануға беру мерзімі көрсетілген ғой… – деп нақтылай түсті Жәмішев.
– Біз әзірге тек құрылысты аяқтауды жоспарлап отырмыз, – деп өз баяндамасындағы шамадан тыс оптимизмді мойындады Жамауов.
ЗАУЫТ КІМГЕ ТИЕСІЛІ
Отырыстан кейін «QazaqGaz» ұлттық компаниясы басқарма төрағасының орынбасары Батыржан Тергеусізов зауыттың ЕРС мердігері «Kazakh Construction Group» (KCG) компаниясы екенін айтты. Оның түпкі иесі – кәсіпкер Мүтәліп Шахмұрат.
Айта кетейік, Шахмурат қазіргі таңда президент Қасым-Жомарт Тоқаевпен бірге Вашингтонда өткен С5+1 саммитіне қатысып жүр.
Бұған дейін Ulysmedia.kz Қашағандағы ГӨЗ құрылысына қаржы салуға GPC Investment компаниясы дайын екенін мәлімдеген. Алайда бұл компания бар болғаны бес қызметкері бар шағын кәсіпорын ретінде тіркелген және мұнай-газ саласындағы ірі жобаларды жүзеге асыру тәжірибесі жоқ. Соған қарамастан, дәл осы компанияға «ғасыр құрылысы» деп аталған жобаны сеніп тапсырған.
Бұл шешім Атырау облысында көптеген сұрақ тудырған.
