Астанадағы наразылық: Ұлттық ұлан генералы аналарды заңға бағынуға шақырды

Мән-жай

Басқожаев ғимаратқа телефон алып кіруге болмайтынын айтты. Оның сөзінше, әр жердің өзінің регламенті бар. Соған бағыну қажет. Бірақ оның бұл сөзіне аналар қарсылық білдірді. Олар ішке журналистердің де кіруін талап етті.

- Регламент бойынша тоғыз адам арыз жазғансыздар. Біз де тоғыз адам, қосымшадағы тізімнен тыс адамдарды кабылдауға әзірміз. Бірақ бұл жердің өзінің регламенті бар, – деді ол.

Ulysmedia тілшісінің хабарлауынша, ішке наразы аналардың жартысы кірген. Журналистер кіргізілмеген. 

Контекст

Бүгін Астанада бір топ ана «Баланы әскерге барып өлсін деп туған жоқпын» деген плакат асынып, наразылық акциясына шыққан.

Аналар ҚР Конституциясының 1-бабы: «Адам өмірі – ең жоғары құндылық» және 12-бабы: «Әр адам өзінің құқықтары мен бостандықтарын қорғауға хақылы» қағидаларына сүйене отырып:

• Әскери қызмет кезінде қаза тапқан немесе мүгедек болған сарбаздардың отбасына өтемақы мемлекет тарапынан міндетті түрде төленсін.
• Өтемақы әділ, тең және әр жағдайда жеке қарастырылып, қоғам өкілдері мен ата-аналардың қатысуымен анықталсын.
• Мемлекет әр сарбаздың өмірін қорғауға міндетті болып, келісімшартқа арнайы «Өмір мен денсаулықтың кепілді сақтандыру» бабын енгізсін.
• Бұл өтемақы қоғамдық әділеттілік пен мемлекеттің азамат алдындағы жауапкершілігінің көрінісі ретінде қарастырылсын, деген талап қойды. 

Әскери прокуратураның дерегінше, 2020 жылдан 2023 жылдың сәуіріне дейін елдің Қарулы күштерінде 270 адам қаза тапқан. Олардың ішінде 86 әскери қызметкер өз-өзіне қол жұмсаған. Сондай-ақ 20 суицид жасау әрекеті тіркелген. Ал «Өзін-өзі өлтіруге дейін жеткізу» бабымен бар-жоғы бір ғана адам сотталған.