Жеңілдетілген салық режимі - кім ілігіп, кім ілікпейді

ТОЛЫҒЫРАҚ

Қазақстанда 2026 жылдан бастап қандай бизнес түрлері жеңілдетілген декларация негізіндегі арнайы салық режимін қолдана алмайтыны анықталды. Үкімет тиісті қаулыны бекітті.

Ұлттық кәсіпкерлер палатасының мәліметінше, үкімет қаулысы жеңілдетілген декларацияны қолдануға тыйым салынған қызмет түрлерінің тізімін бекітеді. Мұндай экономикалық қызмет түрлерінің жалпы классификаторы бойынша кодтары бар кәсіпкерлік субъектілері жалпыға бірдей белгіленген салық салу тәртібіне көшуге міндетті.

АНЫҚТАМА

Экономикалық қызмет түрлерінің жалпы классификаторы – бұл әртүрлі бизнес түрлерін жіктеу және статистикалық есепке алу үшін сандық кодтар жүйесі.

Тыйым салынғандар қатарына 44 негізгі санат кірді, олар 185 нақты экономикалық қызмет түрінің атауымен егжей-тегжейлі көрсетілген.

ТІЗІМ МЫНАДАЙ

"Атамекен" ұлттық кәсіпкерлер палатасының дерегіне сәйкес, тізімге жоғары маржалық немесе мемлекет тарапынан қатаң реттелетін қызмет түрлері енгізілген. Олардың қатарында:

• барлық қаржылық, сақтандыру және делдалдық қызметтер, оның ішінде ломбардтар, банктер, сақтандыру брокерлері мен агенттері;
• акцизделетін өнімдерді (темекі, алкоголь) өндіру және көтерме сату, сондай-ақ бензин, дизель отыны және мазутты сату (ерекше жағдай – сұйытылған газды бөлшек саудада сату);
• консультациялық және маркетингтік қызметтер, бухгалтерлік есеп, аудит, сондай-ақ адвокаттық және нотариалдық қызмет;
• тұрғын және тұрғын емес ғимараттарды салу – жобалау және құрылыс жұмыстары, сондай-ақ тұрғын үй қорын сату – көппәтерлі және жеке үйлерді сатып алу немесе сату;
• барлық пайдалы қазбаларды өндіру (старательдіктен басқа), сондай-ақ түсті және қара металдар сынығының айналымына қатысты қызмет;
• сауда базарларына және бірқатар санаттағы тұрақты сауда нысандарына қатысты объектілерді қосалқы жалға беруге тыйым енгізілді.

Қызмет түрлері немесе экономикалық қызмет түрлерінің жалпы классификаторы бойынша кодтары аталған құжатта көрсетілген кәсіпкерлерге жалпыға бірдей белгіленген салық режиміне көшуге алдын ала дайындықты бастау және мұқият аудит жүргізу ұсынылады.

ҚАЗАҚСТАНДАҒЫ САЛЫҚ РЕФОРМАСЫ

2026 жылдың 1 қаңтарынан бастап Қазақстанда жаңа Салық кодексі күшіне енеді. Салық реформасы аясында тыйым салынған қызмет түрлерінің тізімін кеңейту жоспарланған болатын. Үкімет, депутаттар және бизнес өкілдерінің қатысуымен ұзақ талқылау жүргізілді. Қыркүйек айында Мәжіліс депутаттары тыйым салынған тізімге шамамен 1000 экономикалық қызмет түрінің жалпы классификаторы енуі мүмкін екенін мәлімдеді.

Кейінірек Қазақстан Республикасы Ұлттық экономика министрлігі жеңілдетілген декларация негізіндегі арнайы салық режимін қолдануға тыйым салынған қызмет түрлерінің тізімін бекітетін үкімет қаулысының жобасын жариялады. Бұл тізімге 1111 экономикалық қызмет түрінің жалпы классификаторының ішінен 795 түрі енді, бұл шамамен салық төлеушілердің 30 пайызын құрайды.