Ulysmedia.kz Қазақстанның көлік нарығындағы жаңа үлгілерді таныстыруды жалғастырады. Бұрын таңдауымыз санаулы болса, бүгінгі таңда, əсіресе қытайлық брендтердің қаптауымен, нарық əбден қызды. Осы алуан көліктің ортасында біздің назарымызға Еуропаның төл өкілі — Škoda Kodiaq Sportline ілікті.
Škoda Kodiaq Sportline – айқайлап көзге түсуге ұмтылмай, байсалды мінезімен баурайтын модель. Оны тəрбиелі ортада өсіп, шетелде білім алған, асып-таспайтын салмақты жігітке ұқсатуға болады. Ол жарқырап мақтанбайды, бірақ еңсесін тік ұстап, өз міндетін анық атқарады.
2021 жылы бренд Қазақстан нарығынан уақытша кеткенімен, 2024 жылы екінші буындағы жаңа модельмен Қостанайдағы Allur зауытында құрастыруды қайта бастады. Бүгінде Kodiaq отандық Allur зауытында SKD əдісімен құрастырылып, еліміздің нарығына еуропалық сапаны ұсынып отыр. Бұл Чехияда «тəрбиеленгенімен», өз жерімізге бейімделіп оралған тұлпар деуге болады.
Kodiaq Sportline-ға қарасаңыз, көз алдыңызға спортзалдан шықпайтын шымыр спортшы елестейді. Қазіргі кей бəсекелестердегідей қолдан «үрленген» шамадан тыс дизайн жоқ – бұл модель ықшам да ұстамды көрінеді. Sportline нұсқасына тəн қара түсті элементтер алдыңғы радиатор торы, айнаның қаптамалары, рейлингтер оның спорттық мінезін айшықтай түседі.
Екінші буынның өлшемдері де өзгерген: ол алдыңғы буыннан 61 мм-ге ұзын (4758 мм), бірақ сонымен бірге ені 18 мм-ге қысқарды (1864 мм) жəне 17 мм-ге аласа (1659 мм). Бұл оның сымбатын одан сайын спорттық əрі тұрақты ете түскен.
Ал озық Matrix LED шамдары жай ғана əсемдік үшін емес, оның «ақылды» сипатын да айшықтайды: Crystallinium элементтері бар бұл жарық шамдары түнгі жолда қарсы келе жатқан жүргізушінің көзін шағылыстырмай, жарық сəулесін тек қажетті бөлігін ғана жарықтандырады. Бұл – өзгенің жайын ойлай білетін зерделі жүйе.
Салонға кірген сəтте-ақ талғамы жоғары адамның үйіне қонаққа келгендей əсер аласыз. Мұнда көз тартатын арзан жылтырақ жоқ, барлық бөлшектер орнықты стилімен жəне сапалы материалдармен орындалған.
Sportline нұсқасына тəн мата, алькантара жəне былғарымен қапталған спорттық алдыңғы орындықтар денеңізді құшақтап ұстап, ұзақ жолда шаршатпайды.
Жаңа буында заманауи жабдықтар да толықтырылған: орталық консольдегі 13 дюймдік үлкен дисплей, цифрлы аспаптар панелі, алдыңғы əйнектегі проекция (HUD) жəне Canton аудиожүйесі. Бұл технологиялар өздерін жарнамалап көзге түспейді, бар болғаны сізге қажетті қызметін атқарады. Панорамалық шыны төбе кең əрі жарық кеңістік сезімін сыйлайды.
Əрине, Škoda-ның фирмалық Simply Clever ұсақ-түйек шешімдері де көңіл қуантады: есіктегі жасырын қолшатыр, есік ашылғанда автоматты түрде шығатын қорғаныш жиегі, дисплейді сүртуге арналған шүберек, есік қалтасындағы шағын қоқыс шелегі – бəрі жолдағы ұсақ қолайсыздықтарды болдырмас үшін ойластырылған ұқыптылықтың белгілері.
Бұл «жігіт» сымбатты болғанымен қатар, өте қуатты. Оны түн ортасында оятып, «қазір марафонға жүгір» десеңіз де дайын тұратындай сергек.
Kodiaq-тың жүрегінде 2.0 литрлік турбо қозғалтқыш орналасқан. Қазақстан нарығына арналған ресми нұсқаның қуаты 190 ат күшін, ал айналу моменті 320 Нм құрайды. 7 сатылы DSG роботты беріліс қорабы ауысымды мүлде сездірмей өзгертіп отырады, ал толық жетек жүйесі біздің қатал қысқы жолдарда қосымша сенімділік береді.
Ол 0-ден 100 км/сағ жылдамдыққа шамамен 7,8 секундта жетеді – бұл жолда ешкімнен қалыспайтын, сенімді көрсеткіш. Қажет кезде жылдамдықпен озып шығу ма, биік қырға көтерілу ме – Kodiaq еш именбейді, тапсырманы мүлтіксіз орындауға дайын.
Дегенмен, ол өз «диетасын» қатаң ұстайды, яғни сапасыз отынмен қоректендіруге көнбейді. АИ-92 бензинін құюға болмайды, өндіруші тек октаны жоғары АИ-95 пен одан жоғары (98, 100) бензинді қолдануды талап етеді. Бұл – оның еркелігі емес, өз қадір-қасиетін білетіні деп ұққан жөн.
Сыртынан спортшы, ал ішкі дүниесі байсалды интеллектуал секілді көрінгенімен, бұл көлік – отбасылық құндылықтарды жоғары бағалайтын жандар үшін нағыз сенімді серік. Kodiaq-тың артқы қатар жолаушылары да назардан тыс қалмаған: ұзақ сапарларды ыңғайлы етуге арналған түрлі ұсақ-түйектер, планшет қоятын тіреуіштер, терезелерінде күннен қорғайтын перделерге дейін ойластырылған.
Ал оның көлемді жүксалғышы жомарттығын көрсетеді. Kodiaq Sportline 5 орындық нұсқада ұсынылады, бұл кезде жүксалғыштың таңғаларлық көлемі 910 литрді құрайды. Ал артқы орындықтарды толық жинасаңыз, тегіс еденді 2105 литрге дейінгі кеңістік пайда болады. Бұл – балалардың арбасынан бастап, отбасылық саяхатқа қажет барлық бұйымдарды оңай сыйғызуға мүмкіндік бар деген сөз.
