Қазақстанда ІІМ қызметкерлері құрамында есірткі бар және күшті әсер ететін 100 мыңнан астам дәрілік заттың айналымын бақылауға алды, деп хабарлайды Ulysmedia.kz.
ТОЛЫҒЫРАҚ
2025 жылдың басынан бері ІІМ «Дәрмек» жедел-профилактикалық іс-шарасының үш кезеңін өткізді. Оның аясында есірткі қылмысына қарсы іс-қимыл комитетінің қызметкерлері медициналық мекемелер мен жеке дәріханаларды тексерді. Негізгі назар мемлекеттік бақылауға жататын препараттарды сақтау, есепке алу және сату ережелерінің сақталуына аударылды.
– 1200 медициналық мекеме тексерілді. Нәтижесінде көптеген заңбұзушылықтар анықталды, оның ішінде күшті әсер ететін дәрілерді рецептісіз сату фактілері бар. Тексеру қорытындысы бойынша 1000-нан астам материал жасалып, кінәлі тұлғаларды әкімшілік жауапкершілікке тарту үшін Денсаулық сақтау министрлігінің аумақтық медициналық және фармацевтикалық бақылау департаменттеріне жолданды, – деді ІІМ есірткі қылмысына қарсы іс-қимыл комитеті басқармасының бастығы Бақытжан Әмірханов.
Жалпы айыппұл сомасы 150 миллион теңгеден асты.
Әмірхановтың айтуынша, 2026 жылдың 1 қаңтарынан бастап күшті әсер ететін заттардың заңсыз айналымы үшін қылмыстық жауапкершілік енгізіледі. Ол қолданыстағы заң талаптарын қатаң сақтау қажеттігін еске салды.
