Атом энергиясы жөніндегі агенттік басшысы Алмасадам Сәтқалиев Қазақстанда салынатын алғашқы толыққанды атом электр станциясының құрылысына дайындық кезеңі және ауқымды жұмыстар қашан басталатынын айтып берді, деп хабарлайды Ulysmedia.kz.
Алғашқы бетонға дейін – төрт жыл
Сәтқалиевтің айтуынша, қазір жоба аясында бірінші конструкциялық бетонды құюға дайындық жүріп жатыр. Алайда бұл — көп инженерлік зерттеулерді талап ететін ұзақ кезең. Құрылыс кезінде қауіпсіздікті қамтамасыз ету және барлық нормаларды сақтау үшін бірнеше жыл қажет болуы мүмкін.
— Атом саласында мұны «алғашқы бетон» деп атайды. Оның дәл мерзімін жобалық зерттеулер ғана анықтай алады. Көп нәрсе жабдыққа, жобалау жұмыстарына байланысты. Ресей жобасы бойынша біз 2029 жылға бағытталып отырмыз, — деді Алмасадам Сәтқалиев.
Өте күрделі процесс
2026 жылы болашақ қазақстандық АЭС алаңында жобалық және зерттеу жұмыстары жүргізіледі. Яғни не және қай жерде салынатыны анықталады, бірақ нақты нысандарды тұрғызу одан кейінірек басталады.
— Атом электр станциясын салу — өте күрделі технологиялық процесс. Ол ең мұқият зерттеу мен аса жіті дайындықты талап етеді. Қазір бұл жұмыстар жүріп жатыр, қазақстандық мердігерлер де тартылуда, — деп түсіндірді Алмасадам Сәтқалиев.
