Атышулы Айка бостандыққа шықты

ТОЛЫҒЫРАҚ

Абай облысы Жарма аудандық соты блогер Айканың жазаны орындауды кейінге қалдыру туралы өтінішін қарап, оны қанағаттандырды. Ақпаратты соттың баспасөз қызметі растады.

АЙЫПТАУ ҮКІМІ

Сот дерегінше, Айка 2024 жылдың 21 мамырындағы үкіммен ҚР Қылмыстық кодексінің 296-бабының 4-тармағы (есірткі заттарын заңсыз сақтау) және 309-бабы 2-бөлігінің 1) тармағы (жезөкшелікпен айналысуға тарту) бойынша кінәлі деп танылған.

Сот оған 6 жыл 6 ай мерзімге бас бостандығынан айыру жазасын, мүлкін тәркілеуді және жазаны орташа қауіпсіздік колониясында өтеуді белгілеген.

БҰҒАН ДЕЙІНГІ ӨТІНІШ

Заңда көзделген бөлігін өтеп шыққаннан кейін Айка жазаның өтелмеген бөлігін жеңілірек жаза түріне ауыстыруды сұрап, сотқа жүгінген. Алайда 2025 жылғы 31 шілдеде Жарма аудандық соты бұл өтінішті қанағаттандырмаған.

ЖАЗАНЫ КЕЙІНГЕ ҚАЛДЫРУ

Қылмыстық кодекстің 74-бабына енгізілген өзгерістер күшіне енгеннен кейін, сотталғанның адвокаты жазаны кейінге қалдыру жөнінде қайта өтініш берді.

Өтінішті қарау барысында Айканың өзі, адвокаты, №23 мекеме өкілі және прокурор бұл ұсынысты қолдаған.

Сот Айканың 2020 жылы туған кәмелетке толмаған баласы барын анықтады. Ол оң мінез-құлық танытып, жеңілдетілген жағдайда ұсталады, бір көтермелеуі және бір тәртіптік жазасы бар. Сондай-ақ оның орындауға тиіс берешектері жоқ.

СОТ ШЕШІМІ

Сот ҚК-нің 74-бабы кәмелетке толмаған баласы бар әйелдерге жазаны кейінге қалдыруға мүмкіндік беретінін атап өтті. Айканың ісі бұл шектеулерге жатпайды.

Баланың мүддесін және жасалған қылмыстардың сипаты мен ауырлығын ескере отырып, сот жазаны орындауды екі жылға кейінге қалдыру туралы шешім қабылдады.

ҚАДАҒАЛАУ

Айканың мінез-құлқын бақылау оның тұрғылықты жері бойынша пробация қызметіне жүктелді.

БҰҒАН ДЕЙІН

Еске сала кетсек, былтыр мамырда «Айка тізімі»: Алматыдағы қылмыстық ісі бойынша сот үкім шығарған еді. Алматыда сенсациялық «Айка тізімі» бойынша үкім шықты. Айыпталушының айыптау орнында екі адам отыр.

Ұйымдастырушы 6 жыл 6 айға бас бостандығынан айырылды. Екінші күдікті 3,8 жылға бас бостандығынан айырылды.