АҚШ армиясының мемлекеттік хатшысы Дэн Дрисколл Украинадағы соғысты тоқтату мақсатындағы жаңа бастаманың аясында Абу-Дабиде Ресей өкілдерімен жоспардан тыс келіссөздер жүргізді, деп хабарлайды Ulysmedia.kz.
Абу-Дабиде өткен бұл кездесулер АҚШ президенті Дональд Трамп әкімшілігінің Украинадағы соғысты тоқтатуға бағытталған қарқынды дипломатиялық әрекеттерінің бір бөлігі болды. Сейсенбі күні жаңа келіссөздер жалғасады деп күтілуде.
ТОЛЫҒЫРАҚ
Келіссөздер АҚШ пен Украина өкілдерінің бейбіт келісім жөнінде ортақ позицияға келуге тырысқан тұста өтті. Негізгі мәселелер әлі шешілген жоқ. Украина, әсіресе, келісім Кремль ұсынған шарттарға негізделіп кетуі мүмкін деп алаңдайды.
Абу-Дабиде өткен келіссөздердің нақты мазмұны әзірге белгісіз. Америкалық шенеуніктің Reuters агенттігіне растауынша, ресейлік делегацияның құрамы да жария етілмеген. Шенеунік Дрисколлдың АҚШ-тың дипломатиялық қимылдарындағы басты тұлғалардың бірі екенін, ол Абу-Дабиде Украина өкілдерімен де кездесуді жоспарлап отырғанын айтты.
Украина үшін жағдайдың қаншалықты қиын екенін Киевтегі түнгі шабуыл айқын көрсетеді: қала жаппай зымыран соққылары мен жүздеген дронның шабуылына ұшырады. Алты адам қаза тапты. Тұрғындар қыстық киіммен жер асты баспаналарында паналап, кейбірі тіпті шатырларда түнеген.
