29 қараша таңғы 08:00-ден бастап Қырғызстанда барлық сайлау алдындағы үгіт-насихат жұмысы тоқтатылды. 30 қараша өтетін мерзімінен бұрын парламенттік сайлау қарсаңында «тыныштық күні» басталды, деп хабарлайды Ulysmedia.kz.
ТОЛЫҒЫРАҚ
Бұл күні сайлаушыларға сабырмен өз таңдауын жасауға мүмкіндік беріледі. Кез келген үгіт-насихатқа қатаң тыйым салынады: қандай да бір кандидатқа дауыс беруге шақыруға, олардың бағдарламаларын талқылауға немесе жаңа үгіт материалдарын, соның ішінде интернетке жазбаларды орналастыруға болмайды. Ережені бұзғандар үшін айыппұл қарастырылған. Жеке тұлғаларға 75 есептік көрсеткіш (шамамен 44 мың теңге) көлемінде айыппұл салынуы мүмкін.
ЕСКЕ САЛАЙЫҚ
Дауыс беру күні жақындаған тұста елде бірқатар атышулы оқиға болды. 22 қарашада құқық қорғау органдары бұрынғы бірінші ханым Раиса Атамбаева тұратын пәтерге тінту жүргізді. Осыдан кейін оны және ұлы Кадырбекті ІІМ Тергеу қызметіне жауап алуға жеткізді. Сол күні саясаткер Темірлан Сұлтанбеков, оның анасы Кыял Токторбаева, сондай-ақ Шайлообек Атазов, Сыймык Жапыкеев және Кубанычбек Кадыров бөлімшеге жеткізілді.
Кейін Қырғызстанның ІІМ сайлаудан кейін жаппай тәртіпсіздік ұйымдастыруды жоспарлаған топты ұстағанын мәлімдеді. Ұсталғандардың ішінде елдің бұрынғы президенті Атамбаевтың ұлы да бар.
