Новороссийск маңындағы Каспий құбыр желісі консорциумының теңіз терминалы тағы да шабуылға ұшырады. 29 қараша таңертең су үстіндегі ұшқышсыз қайықтар акваторияға шабуыл жасап, ВПУ-2 ауыспалы айлақ құрылғысын зақымдады, деп хабарлайды Ulysmedia.kz.
МӘН-ЖАЙ
КТК дерегінше, жарылыс Астана уақытымен 06:06-да болған. Консорциум бұл оқиғаны әдейі жасалған террористік шабуыл деп атады. Порт капитанының бұйрығымен барлық тиеу жұмысы дереу тоқтатылып, танкерлер акваториядан шығарылды. Консорциум қызметкерлері мен мердігерлер арасында зардап шеккендер жоқ.
Жарылыс кезінде авариялық қорғаныс жүйесі тиісті құбырларды автоматты түрде жапқан. Алдын ала мәлімет бойынша, Қара теңізге мұнай төгілмеген. Қазір мамандар су сынамаларын алып, экологиялық мониторинг жүргізіп жатыр және төтенше жағдай туындаған жағдайда оны жою жоспары бойынша әрекет етеді.
КТК өкілдері зақымданған ВПУ-2 құрылғысын пайдалануға болмайтынын мәлімдеді. Теңіз дрондарынан төнген қауіп жойылғаннан кейін ғана мұнай тиеу қайта басталады.
КОНТЕКСТ
Бұл — осымен үшінші ұқсас оқиға. Бұған дейін «Кропоткинская» мұнай айдау станциясы мен Новороссийск маңындағы терминал офисі шабуылға ұшыраған еді.
Еске салайық, 24 қыркүйекте Новороссийскіге жаппай дрон шабуылы жасалып, екі адам зардап шеккен еді. Сол кезде Қазақстан Энергетика министрлігі құбырдың қазақстандық учаскесінде мұнай қабылдау жұмыстары шектеусіз жалғасқанын хабарлаған.
