Жаңа жылдан бастап айыппұлдар өседі

ТОЛЫҒЫРАҚ

Айлық есептік көрсеткіш – мемлекет бекіткен тұрақты сома. Ол айыппұлдарды, жәрдемақыларды, салықтарды, әлеуметтік төлемдер мен жеңілдіктерді есептеу үшін қолданылады. Бұл жүйе әр төлемді қайта-қайта есептемей, бір көрсеткішке байлап қоюға мүмкіндік береді.

2026 жылдың 1 қаңтарынан бастап Қазақстанда айлық есептік көрсеткіш 4 325 теңге болады. Қазір ол 3 932 теңге. Демек, көрсеткіш 393 теңгеге өседі.

2026 ЖЫЛДАҒЫ ЕҢ КӨП ҚОЛДАНЫЛАТЫН АЙЫППҰЛДАР

Айлық есептік көрсеткіштің өсуіне байланысты айыппұлдар да өзгереді.

• Жылдамдықты 10–20 шақырымға асырса – 5 айлық есептік көрсеткіш, яғни 21 625 теңге.
• 20–40 шақырымға асырса – 10 айлық есептік көрсеткіш, яғни 43 250 теңге.
• 40 шақырымнан артық асырса – 20 айлық есептік көрсеткіш, яғни 86 500 теңге.
• Бір жыл ішінде қайталанса – 30 айлық есептік көрсеткіш, яғни 129 750 теңге.
• Жүргізуші куәлігінсіз көлік жүргізу – 5 айлық есептік көрсеткіш (21 625 теңге).
• Жол белгілерін немесе сызықтарын сақтамау – 3 айлық есептік көрсеткіш (12 975 теңге).
• Қызыл шамға өту – 10 айлық есептік көрсеткіш (43 250 теңге), қайталанса – 15 айлық есептік көрсеткіш (64 875 теңге).
• Жаяу жүргінші жолымен көлік жүргізу – 15 айлық есептік көрсеткіш (64 875 теңге).
• Дұрыс емес тұрақ – 5 айлық есептік көрсеткіш (21 625 теңге).
• Тротуарға қою – 10 айлық есептік көрсеткіш (43 250 теңге).
• Тұрақ ақысын төлемеу – 3 айлық есептік көрсеткіш (12 975 теңге).
• Полицейдің тоқтау талабын орындамау – 40 айлық есептік көрсеткіш (173 000 теңге). Қайталанса жүргізуші куәлігінен айыру және 5 тәулікке дейін қамау қарастырылған. Ал бұрыннан куәлігінен айырылғандар үшін – 60 айлық есептік көрсеткіш (259 500 теңге).
• Жолаушыларды тасымалдау ережесін бұзу, белдік тақпау немесе рөлде телефон қолдану – 5 айлық есептік көрсеткіш (21 625 теңге).
• Жаяу жүргіншілер жол ережесін бұзса – 2 айлық есептік көрсеткіш (8 650 теңге), қайталанса – 10 айлық есептік көрсеткіш (43 250 теңге).
• Қоғамдық орындарда ішімдік ішу немесе мас күйде жүру – 5 айлық есептік көрсеткіш (21 625 теңге), ең көбі – 10 айлық есептік көрсеткіш (43 250 теңге).
• Қоғамдық орындарды, саябақтар мен алаңдарды ластау – 10 айлық есептік көрсеткіш (43 250 теңге), қайталанса – 20 айлық есептік көрсеткіш (86 500 теңге).

ЖӘРДЕМАҚЫЛАРҒА ӘСЕРІ

Айлық есептік көрсеткіш кейбір жәрдемақыларды есептеуде қолданылады. Мысалы:

• бала күтімі бойынша жәрдемақы (жартылай),
• мүмкіндігі шектеулі балаға арналған жәрдемақы,
• асыраушысынан айырылғандарға төленетін жәрдемақы,
• мүгедектік жәрдемақы,
• көпбалалы аналарға берілетін жәрдемақы.

2026 жылы олардың кейбірі индекстеледі деп күтілуде. Сондықтан нақты мөлшер кейін белгілі болады.