Украинаға МиГ-29 ұшақтарын беру – одақтастардың қолдау саясатының бір бөлігі екенін Польша Қарулы күштерінің Бас штабы мәлімдеді. Елдің Қорғаныс министрі нақтылап айтқандай, Варшава бұл үшін дрондар мен зымырандар саласындағы технологияларға қол жеткізбек, деп хабарлайды Ulysmedia.kz.
ПОЛЬША МЕН УКРАИНА
Польша Ресей агрессиясына қарсы күресіп жатқан Украинаны қолдау мақсатында МиГ-29 әскери ұшақтарын беруге қатысты келіссөздер жүргізіп жатыр. Бұл туралы Польша Қорғаныс министрі Владислав Косиняк-Камыш 10 желтоқсан, сәрсенбі күні Trojka радиосының эфирінде мәлімдеді. Ол Варшава келіссөздерді мүмкіндігінше тезірек аяқтағысы келетінін атап өтті.
Министрдің айтуынша, белгілі бір уақыттан кейін МиГ-29 ұшақтары қызмет мерзімінің аяқталуына байланысты Польша Әскери-әуе күштерінің қару-жарақ құрамында қалмайды.
– «Біз Украинамен МиГ-29 ұшақтарын беру туралы келіссөздер жүргізіп жатырмыз. Сонымен қатар Польшаға дрондар технологиясы сияқты жаңа технологияларды беру мәселесін талқылаудамыз. Бұл ынтымақтастық екіжақты болуы тиіс», – деді Косиняк-Камыш.
БАС ШТАБТЫҢ ТҮСІНДІРМЕСІ
Польша Қарулы күштерінің Бас штабы Киевке ұшақтарды беру ықтималдығы олардың ескіргеніне және кеңестік кезеңде жасалған бұл үлгілерді жаңарту мүмкіндігінің жоқтығына байланысты екенін нақтылады.
Польшадағы ескірген МиГ-29 ұшақтарының орнына америкалық F-16 және оңтүстіккореялық FA-50 ұшақтары келеді. Сонымен қатар Польша Америка Құрама Штаттарынан 32 F-35 ұшағын жеткізуді күтуде.
9 желтоқсан күні кешке жарияланған мәлімдемеде Киевке МиГ-29 ұшақтарын беру «Украинаны қолдау және Солтүстік Атлантикалық альянстың (NATO) шығыс қапталындағы қауіпсіздікті қамтамасыз ету саясатының бір бөлігі» екені айтылды.
ҚАЗІРГІ ЖАҒДАЙ
Бұқаралық ақпарат құралдарының деректеріне сәйкес, бүгінде Польша Қарулы күштерінің қару-жарағында 14 МиГ-29 ұшағы бар.
