Қазақстанның сыртқы істер министрі Ермек Көшербаев Украина сыртқы істер министрі Андрей Сибигамен КҚК құбырының терминалына жасалған соңғы шабуыл жөнінде сөйлескенін растады, деп хабарлайды Ulysmedia.kz.
«Жағдай тұрақты болуы тиіс»
Ақордадағы іс-шараның кулуарында Ермек Көшербаев журналистерге Венада украиналық әріптесімен қандай мәселелерді талқылағанын айтты. Еске салайық, желтоқсанның басында қос министр ЕҚЫҰ-ның Сыртқы істер министрлері кеңесінің 32-отырысында бірге қатысқан болатын. Сыртқы істер министрі Қазақстанның КТК құбырына қатысты өз ұстанымын Украинаға жеткізгенін растады.
— Екіжақты ынтымақтастық, сауда қатынастары жөніндегі мәселелер талқыланды. Құбырдың қауіпсіздігіне қатысты сұрақ та, әрине, назардан тыс қалған жоқ. Украин тарапында жағдайдың тұрақты болуы қажет деген түсіністік бар, — деді Ермек Көшербаев.
ЗЕРТТЕУ
29 қарашада Украина дрондары Теңізден экспортталатын қазақстандық мұнайды тасымалдайтын «Каспий құбыр желісі консорциумының» инфрақұрылымына соққы жасады. Бұл соққы бұрын-соңды болмаған ауқымда болып, Новороссийск портындағы терминалдардың бірі толықтай дерлік істен шықты. Ulysmedia.kz Қазақстан неге осы жылдар ішінде КҚК-ға балама таба алмағанын, бұл құбырдың елдегі әр азамат үшін маңызы неде екенін және экономикалық тұрғыда Қазақстанмен қатар зардап шеккен АҚШ-тың неге үнсіз отырғанын талдап көрген еді.
