Украина қауіпсіздік қызметі (СБУ) Sub Sea Baby суасты дрондары Новороссийск портында «Варшавянка» сүңгуір қайығын істен шығарғанын хабарлады. Ресейдің Қара теңіз флоты бұл ақпаратты жоққа шығарды, алайда шабуыл болғанын растады, деп хабарлайды Ulysmedia.
Мән-жай
Украина қауіпсіздік қызметі (СБУ) Sub Sea Baby суасты дрондары Новороссийск портында Ресейдің «Варшавянка» сүңгуір қайығын жарып жібергенін мәлімдеді. Арнайы қызмет соққы сәті делінген видеоны жариялады.
«Сүңгуір қайыққа ауыр зақым алып, іс жүзінде істен шығарылды», — делінген қауіпсіздік қызметі жариялаған мәлімдемеде.
Бейнежазбаға қарағанда, жарылыс сүңгуір қайықтың корпусы маңында болған. Детонациядан кейін сүңгуір қайық айлақта қозғалыссыз қалпында тұрған. Жақын маңда Ресей әскери-теңіз флотының басқа кемелері болған, алайда оларға шабуыл жасалмаған.
Украина қарулы күштері сүңгуір қайықтың бортында Украинаға соққы жасау үшін қолданылатын «Калибр» қанатты зымырандарының төрт ұшыру қондырғысы орналасқанын мәлімдеді. Арнайы қызметтің бағалауынша, «Варшавянка» класындағы бір сүңгуір қайықтың құны шамамен 400 миллион АҚШ долларын құрайды.
Ресей сүңгуір қайықтың жойылғанын жоққа шығарды
15 желтоқсан кешке Ресей Қара теңіз флотының баспасөз қызметінің жетекшісі Алексей Рулев СБУ-дың Новороссийскідегі ресейлік сүңгуір қайықтың жойылғаны туралы мәлімдемесі «шындыққа сәйкес келмейді» деп хабарлады.
Ведомство шабуыл фактісін мойындады, алайда «украиналық диверсия әрекеті» мақсатына жетпегенін, Новороссийскіде «бірде-бір кеме немесе сүңгуір қайық зақымданбағанын» мәлімдеді.
