Ұлыбритания билігі Ресейге қарсы санкцияларды кеңейтті. Ресей Украинаға қарсы толық ауқымды соғысты бастағанына төрт жылға жуық уақыт өтті. 18 желтоқсан, бейсенбі күні Ұлыбритания үкіметі жариялаған хабарламада қара тізімге тағы 24 жеке және заңды тұлға енгізілгені айтылды, деп хабарлайды Ulysmedia.kz.
ТОЛЫҒЫРАҚ
Олардың қатарында ресейлік мұнай компаниялары — «Татнефть», «Русснефть», «Руснефтегаз» және «ННК-Ойл» бар.
Сонымен қатар Лондонның шектеу шаралары «Текстиль-сервис», «Фабрика ваты», Біріккен Араб Әмірліктеріндегі Saphira Energy, Ферғана химия зауыты және Өзбекстандағы Gelion Business Trade пен Chemistry International компанияларына қатысты қолданылды. Санкциялық тізімге бес жеке тұлға да енгізілді.
ҚАЗАН АЙЫНДАҒЫ ШАРАЛАРДЫҢ ЖАЛҒАСЫ
Ресейдің мұнай саласына қарсы санкциялардың күшеюі қазан айында «Лукойл» мен «Роснефть» сияқты ірі компанияларға енгізілген шаралардың жалғасы болды. Бұл компанияларға қарсы санкцияларды АҚШ та қатар енгізген еді.
ЕУРОПАЛЫҚ ОДАҚ САНКЦИЯЛАРДЫ КЕҢЕЙТТІ
Сол күні Еуропалық Одақ Ресейдің «көлеңкелі флоты» деп аталатын тағы 41 танкерді қара тізімге қосты. Осылайша санкцияға іліккен кемелердің жалпы саны 600-ге жуықтады. Бұл кемелер ресейлік мұнайды санкцияларды айналып өтіп тасымалдағандықтан, Еуропалық Одақ порттарына кіруге және теңіз инфрақұрылымының кез келген қызметін пайдалануға тыйым салынды.
БРЮССЕЛЬДЕГІ САММИТ ЖӘНЕ РЕСЕЙ АКТИВТЕРІ
Бұл шара 18 желтоқсанда Брюссельде басталған Еуропалық Одақ саммитінің аясында қабылданды. Саммитте Ресейдің Еуропалық Одақта бұғатталған активтеріне қатысты шешім қабылдау жоспарланған. Еуропалық Одақ пен оның көптеген мүше мемлекеттерінің, соның ішінде Германияның да басшылары Еуропалық комиссияның жоспарын қолдауға шақырды. Бұл жоспарға сәйкес, Еуропалық Одақта бұғатталған ресейлік қаражат Украинаға «репарациялық несие» ретінде пайдаланылуы тиіс және мемлекеттер ұлттық кепілдіктер беруі қажет.
Ресейдің қаражатын қайтару тек соғыс аяқталғаннан кейін Украинаға репарация төлеген жағдайда ғана мүмкін болады.
