Қазақстанда тұрғын үй бағасы тағы да өседі деп күтілуде. Сарапшылардың айтуынша, қымбаттау бірінші кезекте жаңа салынған үйлерге әсер етеді. Бұған қосымша құн салығының жаңа мөлшерлемесі ғана емес, басқа да факторлар ықпал етпек, деп хабарлайды Ulysmedia.kz.
БАҒАНЫҢ ӨСУІ
Қазақстанда тұрғын үй бағасы үздіксіз көтерілуде. Energyprom.kz дерегіне сәйкес, бір жыл ішінде жаңа пәтерлердің бағасы 13,1%-ға, ал екінші нарықтағы үйлердің бағасы 11,6%-ға артқан. Әсіресе Павлодар, Қонаев, Алматы, Шымкент, Қызылорда және Астанада баспана алу қиындап кеткен.
ЕКІНШІ НАРЫҚТАҒЫ ЖАҒДАЙ
Ұқсас жағдай екінші нарықта да байқалады. Алты қалада баға өсімі орташа деңгейден жоғары болды, қалғандарында бәсеңдеу. Кейбір өңірлерде инфляция деңгейінен төмен көрсеткіш тіркелді. Алматы, Павлодар, Талдықорған, Ақтөбе, Түркістан және Шымкентте екінші нарықтағы үйлер қатты қымбаттады. Ал Қызылорда, Қарағанды, Атырау, Ақтау және Өскеменде баға айтарлықтай өзгерген жоқ.
СҰРАНЫС ЖОҒАРЫ
Экономистердің айтуынша, Қазақстанда баспанаға сұраныс әлі де өте жоғары. Үлкен қалаларда тұруға ниеттілер көп. Жастар лайықты жалақысы бар жұмыс іздеп, өңірлерден Алматыға, Астанаға және Шымкентке жаппай көшуде. Мегаполистерде құрылысқа арналған жер тапшылығы бар, учаскелердің бағасы өсіп жатыр, бұл пәтердің қымбаттауына тікелей әсер етеді. Жыл сайынғы инфляция да бағаны көтеріп отыр.
САРАПШЫЛАР БОЛЖАМЫ
Мамандардың пікірінше, өзгерістер жылжымайтын мүлік нарығында уақытша кідіріс тудырады, бірақ дағдарысқа әкелмейді. Базалық мөлшерлеменің көтерілуі қарызды қымбаттатты, ал жаңа Салық кодексі бизнес пен азаматтарды шешім қабылдауда мұқият болуға мәжбүрлейді. Риелторлардың айтуынша, ипотекаға өтінімдер мен мәмілелер саны қазірдің өзінде азайған.
