Бәсекелестікті қорғау және дамыту агенттігі Қостанай мен Қызылорда қалаларындағы әуежайларды әуе отынының бағасын негізсіз көтергені үшін жауапкершілікке тартты, деп хабарлайды Ulysmedia.
Мән-жай
Агенттік аймақтық әуежайларда әуе отынының бағасына қатысты тексеру жүргізіп, нәтижесінде Қостанай және Қызылорда әуежайлары жанармайды жоғары бағамен сатқанын анықтады.
Қостанай облысында Ахмет Байтұрсынұлы атындағы Қостанай халықаралық әуежайы өзінің қызметтік жағдайын теріс пайдаланғаны үшін кінәлі деп танылды. Сот шешімімен әуежайға жалпы сомасы 16,6 млн теңге айыппұл салынды.
Сондай-ақ Қызылорда қаласындағы Қорқыт Ата атындағы әуежайға да осындай шара қолданылды. Әуежай 7,3 млн теңге көлемінде айыппұл төледі, қосымша 2,5 млн теңге заңсыз алынған табысы тәркіленді. Бәсекелестікті қорғау және дамыту агенттігінің нұсқамасына сәйкес, әуе отынының бағасы 780 мың теңгеден 533 750 теңгеге дейін төмендетілді.
