Павлодар әуежайын қайта жаңғырту жұмыстары қайтарылған активтер есебінен қаржыландырылады, деп хабарлайды Ulysmedia.kz.
ТОЛЫҒЫРАҚ
Үкіметтің мәліметінше, әуе айлағын жаңғыртуға Арнаулы мемлекеттік қор қаражатынан 9,3 млрд теңге бөлінген. Жөндеу жұмыстары ұшу-қону жолағын, рулеж жолын және перронды қамтиды. Билік өкілдері қайта жаңғыртудан кейін әуежай ұшу салмағына шектеусіз заманауи әуе кемелерін қабылдай алады деп отыр. Олардың бағалауынша, бұл Павлодар облысының транзиттік мүмкіндіктерін арттырып, жолаушылар ағыны мен іскерлік белсенділіктің өсуіне жағдай жасайды.
– Жобаның негізгі мақсаты – әуежай параметрлерін ICAO халықаралық стандарттарының талаптарына сәйкестендіру, – делінген хабарламада.
ҚАЙТА ЖАҢҒЫРТУ
Жоспарланған жұмыстар қатарына ұшу-қону жолағын 45 метрден 60 метрге дейін кеңейту, рулеж жолы мен перрон жабынын жаңарту, электрмен жабдықтау жүйесін жаңғырту, сондай-ақ жаңа жарық-сигналдық жабдық пен әуежай аумағы бойынша бейнебақылау жүйесін орнату кіреді.
Павлодар әуежайы өткен жылдың сәуір айынан бері уақытша жұмыс істемейді – оның қызметі жөндеу жұмыстарын жүргізу және ұшу қауіпсіздігін қамтамасыз ету мақсатында тоқтатылған. Жабылғанға дейін әуе айлағы Астана мен Алматы бағыттары бойынша тұрақты рейстерге қызмет көрсеткен.
