Астананың әкімшілік құқық бұзушылықтар жөніндегі ауданаралық соты Әсел Досаеваға 786 400 теңге көлемінде айыппұл салды, деп хабарлайды Ulysmedia.kz.
АЛКОГОЛЬ ЖӘНЕ МЕРЗІМІ ӨТКЕН ЖҮРГІЗУШІ КУӘЛІГІ
Соттың анықтауынша, 2025 жылғы 1 қарашаға қараған түні судья Әсел Досаева мас күйінде көлік айдаған. Медициналық куәландыру оның жеңіл деңгейде мас болғанын көрсеткен. Сонымен қатар оның жүргізуші куәлігінің мерзімі өтіп кеткені белгілі болды. Көлік айыптұраққа қойылды.
Алайда судьяны бірден жауапкершілікке тарту мүмкін болмаған. Істі қарауды бастау үшін Бас прокуратура президентке ұсыныс енгізген. Тек осыдан кейін ғана іс сотқа жолданды.
АЙЫППҰЛ
Полиция құқық бұзушылықты Әкімшілік құқық бұзушылық туралы кодексінің 608-бабының 8-бөлігі бойынша – Көлік басқару құқығынсыз мас күйінде жүргізу ретінде саралады. Әдетте бұл үшін әкімшілік қамау қарастырылады. Алайда Досаева қамауға алынған жоқ.
Астана сотының баспасөз қызметінің хабарлауынша, 14 жасқа дейінгі баласы бар әйелдерге әкімшілік қамау қолданылмайды. Досаеваның 2013 жылы туған баласы бар. Сот бұл жағдайда ең қатаң жаза ретінде ақшалай айыппұлды тағайындады.
Қаулы әзірше заңды күшіне енген жоқ.
Әсел Досаева шамамен бір жыл бұрын Маңғыстау облысынан Астанаға көшіп барған. Ол жерде аудандық сотта жұмыс істеген.
