АҚШ президенті Дональд Трамп Ресей мұнайын импорттайтын елдерге қарсы санкциялар енгізуді көздейтін заң жобасын қолдайтынын айтты, деп хабарлайды Ulysmedia.kz.
ТРАМПТЫҢ МӘЛІМДЕМЕСІ
Бірақ ол бұл шараларды қолдануға тура келмейді деп үміттенетінін жеткізді. Трамптың сөзінше, Ресейге қазірдің өзінде "қатаң санкциялар" салынған, ал оның экономикасы "өте нашар жағдайда".
ТАНКЕРДІҢ ЖАҒДАЙЫ
Президент АҚШ жағалау күзеті 7 қаңтарда Атлант мұхитында ұстап қалған Marinera (Bella1) танкеріне қатысты пікір білдірді. Оның айтуынша, кемеден мұнай түсіріліп жатыр.
КОНГРЕСТЕГІ ЗАҢ ЖОБАСЫ
8 қаңтарда сенатор Линдси Грэм әлеуметтік желіде Трамп бұл заң жобасына қолдау көрсеткенін жариялады. Құжат Ресей мұнайын сатып алатын Қытай, Үндістан, Бразилия және басқа елдерге қарсы санкциялар енгізуге мүмкіндік береді.
Бұл заң жобасын Грэм демократ сенатор Ричард Блюменталь және әріптестерімен бірге 2025 жылдың сәуірінде ұсынған. Оны 80-нен астам сенатор қолдап отыр. Құжат Ресейден мұнай, газ, уран және басқа өнімдерді импорттайтын елдерге 500 пайыздық кедендік баж салығын енгізуді қарастырады.
ДАУЫС БЕРУ ТУРАЛЫ
Грэмнің айтуынша, заң жобасы бойынша дауыс беру Конгрессте келесі аптада өтуі мүмкін. Ол бұл шешімнің дер кезінде қабылданатынына сенімді екенін айтты:
"Украина бейбітшілік үшін құрбандыққа барып отыр, ал Путин тек сөйлеп, жазықсыз адамдарды өлтіруді жалғастыруда" – деді ол.
Сенатордың сөзінше, жаңа заң Трампқа Ресей мұнайын сатып алып, Путиннің әскери машинасына жанармай беріп отырған елдерді жазалауға мүмкіндік береді.
