Алматының газ тартылған аудандарындағы кафе, монша және басқа да нысандарға көмір мен отын пайдалануға тыйым салынды, деп хабарлайды Ulysmedia.kz.
ТОЛЫҒЫРАҚ
Қалалық мәслихат бекіткен жаңа ережелерге сәйкес, кәсіпкерлер газға немесе электр энергиясына көшуі, сондай-ақ түтін сүзгілерін орнатуға тиіс. Бұл туралы almaty.tv хабарлады. Кәсіпкерлер тазарту жабдықтарының қымбаттығына алаңдаулы, оның құны 2 млн теңгеден басталады. Алайда билік өкілдері МҚҰ мен ӘКК арқылы жеңілдетілген несиелер ұсынылатынын айтып отыр. Мәслихатта бұл өзгерістердің мақсаты жаза қолдану емес, экологияны жақсарту екенін атап өтті.
ДӘЙЕКСӨЗ
– Ссанитариялық-эпидемиологиялық қызметтер тарапынан санкциялар бұрыннан бар. Егер тексеріс барысында қоғамдық тамақтану нысаны қатты отынды пайдаланатыны анықталса, айыппұл салынады. Бұл айыппұлдар бұрыннан бар. Ал біздің атмосфералық ауаны қорғау қағидаларына сәйкес, қоғамдық тамақтану орындары экологиялық таза отын түрлеріне көшуге және сүзгілер орнатуға міндеттеледі. Бұл талаптарға қатысты кейінге қалдыру кезеңі қарастырылған, яғни ережелер күшіне енгеннен кейін бір жылдан соң ғана қолданылады, – деді Eco Almaty атмосфералық ауаны қорғау департаментінің басшысы Айдана Қасен.
КОНТЕКСТ
Алматы әкімінің орынбасары Алмасхан Сматлаев бұған дейін 2026 жылы қалаға немесе жекелеген аймақтарға автокөліктердің кіруі үшін төлем енгізу жоспарланбағанын хабарлаған. Қазіргі таңда экологиялық аймақтар анықталып жатыр, онда Евро-0 санатындағы көліктердің жүруіне тыйым салынады. Ал төлем енгізу үшін Экологиялық кодекске өзгерістер қажет.
