Қазақстанда мұнай бағасы, жалпы ішкі өнім және инфляцияға қатысты болжамдар қайта қаралды. Бұл туралы сарапшылар қауымдастығы арасында жүргізілген кезекті макроэкономикалық сауалнама нәтижелері көрсетіп отыр, деп хабарлайды Ulysmedia.kz.
МҰНАЙ БАҒАСЫНА БОЛЖАМ
2026 жылға арналған Brent маркалы мұнай бағасы төмендетіліп, баррель үшін 63,8 АҚШ долларынан 62,5 АҚШ долларына түзетілді. 2027 жылға арналған болжам өзгеріссіз қалып, баррель үшін 64,1 АҚШ доллары деңгейінде сақталды. 2028 жылға арналған күтілім баррель үшін 67,5 АҚШ долларын құрады.
ЖАЛПЫ ІШКІ ӨНІМ ӨСІМІ
2026 жылғы жалпы ішкі өнім өсімі 4,9 пайыздан 4,8 пайызға төмендетілді. 2027 жылға арналған болжам айтарлықтай қысқартылып, 5 пайыздан 4,4 пайызға дейін төмендеді. 2028 жылы экономиканың өсімі 4,2 пайыз деңгейінде күтілуде.
ИНФЛЯЦИЯҒА БОЛЖАМ
2026 жылғы инфляциялық күтілімдер 10 пайыздан 10,8 пайызға дейін қайта қаралды. 2027 жылға арналған болжам іс жүзінде өзгеріссіз қалып, 6,9 пайызды құрады (бұрынғысы — 7 пайыз). 2028 жылы инфляция 6,5 пайыз деңгейінде күтілуде.
БАЗАЛЫҚ МӨЛШЕРЛЕМЕ
2026 жылдың соңына қарай базалық мөлшерлеме болжамы 16 пайыз деңгейінде сақталды. 2027 жылға арналған көрсеткіш 13 пайыздан 12,5 пайызға дейін төмендетілді. 2028 жылы инфляциялық қысымның әлсіреуіне байланысты базалық мөлшерлеме 10 пайызға дейін төмендейді деп күтілуде.
ҰЛТТЫҚ БАНКТІҢ МӘЛІМЕТІ
Ұлттық банк мәліметінше, сауалнамаға Қазақстандағы макроэкономикалық көрсеткіштерді талдау және болжаумен айналысатын 13 ұйым қатысты. Респонденттердің қатарында кәсіби нарық қатысушылары, зерттеу институттары, халықаралық ұйымдар және рейтингтік агенттіктер бар. Ұлттық банк бұл сауалнамада өзінің ресми болжамдарын жарияламайтынын атап өтті. Бұл тек кәсіби қатысушылардың Қазақстан мен әлемдік нарықтағы жағдайға қатысты тәуелсіз пікірлері мен күтілімдерінің жиынтық көрінісі болып табылады.
