Қазақстанда дәрі-дәрмек бағасы қатарынан 51 ай бойы өсіп келеді. 2025 жылғы желтоқсан қорытындысы бойынша фармацевтикалық өнімдер бір айда 0,9%-ға, ал бір жыл ішінде 13,6%-ға қымбаттаған, деп хабарлайды Ulysmedia.kz.
ТОЛЫҒЫРАҚ
Ең айқын баға өсімі халық арасында кеңінен қолданылатын препараттар сегментінде тіркелді. Атап айтқанда, «Корвалолдың» бағасы 23,2%-дан астамға, ацетилсалицил қышқылы — 33,9%-ға, парацетамол — 44,6%-ға қымбаттаған. Ал белсендірілген көмірдің құны бір жарым еседен де жоғары өскен, деп жазады Energyprom.
Бұл дәрілер инфляциялық қысымға ең көп әсер ететін позициялар саналады. Себебі олар күнделікті әрі жаппай тұтынылады, ал бағасының өсуі дәріхана нарығындағы жалпы баға қабылдауына тікелей ықпал етеді. Сонымен қатар ассортименттің негізгі бөлігінде баға өсімі салыстырмалы түрде қалыпты деңгейде — 4% бен 12% аралығында болған.
АЙМАҚТАР
Бағаның ең жоғары өсімі Шымкент қаласында тіркелген — 19,6%. Сондай-ақ Батыс Қазақстан облысында — 18,3%, Қарағанды облысында — 17,9% және Жетісу облысында — 17,5% өсім байқалған.
Ал ең төменгі қымбаттау Павлодар облысында — 4,8%, Маңғыстау облысында — 5,5%, Ұлытау облысында — 8,1% және Қостанай облысында — 8,3% деңгейінде тіркелді.
ӨНДІРІС
2025 жылдың қаңтар–желтоқсан айлары аралығында Қазақстандағы фармацевтикалық өнім өндірісі 191,2 млрд теңгені құрады. Бұл соңғы төрт жылдағы ең жоғары көрсеткіш.
Жыл ішінде өндіріс көлемі 2024 жылдың сәйкес кезеңімен салыстырғанда 11,4%-ға артқан. Алайда инфляцияны есепке алғанда нақты өсім небәрі 1,9% болған.
