Астана қаласының қылмыстық істер жөніндегі межрайондық соты жеке медициналық ұйымның құрылтайшысын және Ұлттық денсаулық сақтауды дамыту ғылыми орталығының филиалындағы бұрынғы маманды кінәлі деп таныды. Олар әлеуметтік медициналық сақтандыру қорының қаржысын ірі көлемде жымқырғаны үшін сотталды, деп хабарлайды Ulysmedia.kz.
ЗАҢСЫЗ СХЕМА
Сот деректеріне сәйкес, медициналық ұйымның құрылтайшысы 2023 жылдың сәуірінен шілдесіне дейін азаматтарды өз ұйымына жалған түрде тіркеу арқылы қордың қаржысын ұрлауға бағытталған заңсыз схема ұйымдастырған.
Бұл қылмыстық жоспарды жүзеге асыру үшін ол Ұлттық денсаулық сақтауды дамыту ғылыми орталығының астаналық филиалындағы маманға сыйақы ұсынып, азаматтарды тіркеу жөніндегі жалған өтініштерді заңсыз түрде мақұлдатуды тапсырған. Маман келісімін берген. Нәтижесінде жеке медициналық ұйымға 15 мыңнан астам азамат жалған түрде тіркелген. Соның салдарынан қор шамамен 80 миллион теңгеден айырылып, бұл қаражатты айыпталушылар өзара бөліскен.
СОТ ҮКІМІ
Айыпталушылар кінәсін толық мойындады. Бұған қоса, олардың кінәсі жәбірленушінің және куәгерлердің айғақтарымен, сондай-ақ сарапшының қорытындысымен дәлелденді.
Сот қылмыстық схеманың бастамашысын бес жылға бас бостандығынан айыруға үкім шығарды. Ал оның сыбайласы амнистияға байланысты екі жыл төрт айға түрмеге жабылды.
ЖАҒДАЙДЫ ЖЕҢІЛДЕТЕТІН ФАКТОРЛАР
Сот олардың кішкентай балаларының барын, кінәні мойындағанын, шын жүректен өкінгенін және бұрын сотталмағанын жеңілдететін жағдай ретінде қарастырды. Қатаңдататын жағдайлар анықталған жоқ. Үкім әлі заңды күшіне енген жоқ.
