Құлсарыда мектепте оқушы балтамен шабуыл жасағаннан кейін мектеп директоры қызметінен босатылды, деп хабарлайды Ulysmedia.kz.
МӘН-ЖАЙ
Атырау облысы Жылыой ауданы Пушкин атындағы №6 мектептің басшысы оқу мекемесінде болған төтенше жағдайдан кейін қызметінен айырылды.
Өңірдегі білім басқармасының мәліметінше, 5 ақпанда директорға қатаң ескерту берілген, ал келесі күні ол өз еркімен қызметтен кету туралы өтініш жазған. Ол мектепті 2022 жылдан бері басқарған.
КОНТЕКСТ
10-сынып оқушысы қатарластарымен жанжалдасқаннан кейін мектепке балта әкеліп, дәлізде басқа жасөспірімдерді қуа бастаған. Оқиға салдарынан екі оқушы зардап шекті. Оларға медициналық көмек көрсетілді.
Полицияның мәліметінше, жасөспірім оқиға орнында ұсталған. Сонымен қатар қылмыстық іс қозғалып, оның ата-аналары тәрбиеге немқұрайлы қарағаны үшін әкімшілік жауапкершілікке тартылған.
